Accion di barrio den Village na San Nicolas

Hunto ta aporta na e bon comun

ORANJSATD (AAN): Prome Minister mr. Mike Eman ta sigui di ta cerca di e comunidad y atento cu cada nececidad di e pueblo. Accion di Bario ta brinda e oportunidad pa yega cada bario, cada cas y pero tambe cada organizacion cu ta directamente envolvi cu e ayudo directo den bario.

   Recientemente a bishita Village, San Nicolas y vecindario caminda a topa cu habitantenan, como tambe un grupo den St. Maartenstraat 35, situa caminda antes tabata un cas di oracion ‘Gospel Hall’, cual ta un comision cu ta atende e ciudadano den mas necesidad.

   E comision ta encarga pa comparti cuminda, oracion, algun biaha poco paña y hunto cu esfuerso di henter e comision ta logra yuda hopi famia. E yamada ta bay na esnan cu lo por duna aporte, sea comestible y/of paña por haci esaki. Lo aprecia cualkier ayudo cu por brinda e comision aki. Pasa libremente laga bo aporte cerca nan.

   Premier Eman a indica cu esaki ta temporada di paz y hermandad, ciere di aña ta den porta y hopi ta esnan cu ta den necesidad na e momentonan aki. Ta mas necesario cu nunca pa nos tur saca un man y duna di nos curason na nos ruman cu por ta pasando den tempo dificil.

   E responsabilidad ta grandi, tin reto tur caminda pero nos compromiso ta mas grandi pa yuda unda cu por, ta palabra di Prome Minister Eman. Contento di mira cu tin hende di bon curason yudando nan comunidad y asina nos tur hunto traha riba e bon comun.