Accident pisa a produci 7 morto riba caminda di La Guajira na Colombia

RIOHACHA: Un accident grave di trafico a cobra bida di por lo menos siete persona riba e caminda conoci como ‘Troncal del Caribe’ riba Diamars mainta,

ora cu un Truck tipo trekker a dal contra un Autobus den cual tabatin varios pasahero riba e ruta di Riohacha pa Dibulla, na La Guajira.   E accident a socede cerca di Dibulla, cu ta entre Palomino y Riohacha.

   E accident cruel aki entre e dos vehiculonan, debi na e impacto fuerte a pusha e Autobus (un tipo di Minivan) for di caminda, kibrando full di banda.  Eynan mes a bin topa cu 7 persona sin señal vital, pues ta morto.  Pero e accident ademas a laga por lo menos ocho persona cu herida grave, kendenan a wordo transporta pa Hospital pa wordo atendi.

   No ta conoci cuanto hende tabatin den e Autobus, pero informacion ta mustra cu tur esnan cu a fayece ta hendenan hoben.  Full e banda drechi di e Autobus a habri mescos cu un bleki, y esaki a pone cu hopi di e pasaheronan sin seatbelt a wordo expulsa di e vehiculo.

   E Trekker Truck mes tabata bayendo rumbo pa ciudad di Santa Marta, y parce cu e chauffeur aki a pega soño tras di stuur, y su vehiculo pisa a bay den via contrario net ora cu e Autobus tabata yegando.

   Despues di e impacto, e Trekker Truck cu un trailer tri-axle, a baha di caminda, bolter y keda pega den pida mondi.

   Esnan cu a wordo hiba Hospital ta den estado critico, y lo keda observa si acaso nan salud lo empeora of no.