LIMA: Despues cu e extradiccion pa Merca di e homber hulandes Joran van der Sloot di 36 aña a wordo aproba sin cu tabatin un audiencia den Corte,
su abogado Peruano ta teme cu Fiscalnan na Merca lo ta pensando di agrega acusacionnan adicional.
E abogado Maximo Altez na Peru a bisa prensa cu e no ta confia den e sistema hudicial di Merca aworaki. Esaki ta e abogado cu tabata esun cu a defende den e caso penal pa asesinato cometi riba Stephany Flores den camber di un hotel na aña 2010, y el a core huy pa Chile. Joran van der Sloot ta tambe un sospechoso principal den desaparicion di Natalee Holloway na Aruba na 2005. Pa e asesinato riba Stephany Flores, den Corte na Lima na aña 2012 el a ricibi un castigo di 28 aña di prison.
Segun abogado Altez, e ta sinti cu Merca lo kier agrega acusacion di homicidio riba esnan ya existente di extorsion y fraude electronico. E abogado a keha den fin di siman cu ainda e no por a logra papia cu su cliente, apesar di e noticia inespera di su extradiccion na caminda.
“Nos no ta luchando pa e inocencia di Joran, nos ta luchando pa nan respeta su derechonan,” abogado Altez a bisa, y pesey ta pidiendo pa e haya su dia den Corte na Peru pa defende su mes.
Merca a pidi extradiccion di Joran, originalmente no pa e morto di Holloway, sino acusa di a trata di extorsiona e mama pa e suma di $250.000. Pesey segun abogado Altez, aki hendenan no ta buscando husticia, sino mas bien ta buscando venganza.
Desde Diamars siman pasa caba Gobierno di Peru a aproba e extradiccion. E areglo lo ta temporal. Despues cu e caso bay den Corte na Merca relaciona cu e acusacion di 2010 di extorsion y fraude electronico, Joran van der Sloot lo wordo manda bek pa Peru pa finaliza su castigo pa e asesinato riba Stephany Flores, y un acusacion separa di trafica droga den prison. Aworaki su libertad ta poni pa Juni 2038.
Si e wordo condena na Merca, e lo bay sinta castigo den un prison federal. Si Joran planea pa bringa contra e extradiccion, su abogado Altez lo emiti un peticion di “habeas corpus” pa opone esaki.
Esaki lo paraliza temporalmente e extradiccion. Abogado sa cu esaki ta un sero masha halto mes pa subi pa gana e bataya. Y e tambe ta kere cu Joran aworaki ta manera ricibiendo un huicio den prensa.
Mientras tanto tin informacion cu Joran van der Sloot ta buscando divorcio di Leidy Figueroa cu kende el a casa siendo encarcela den prison. Ora nan a casa, Leidy Figueroa tabata 7 luna na estado.
Awor e muher a fada, ora cu a haya sa cu Joran tabata traficando droga den prison, cu yudanza di un otro pareha. Pues un dolor di cabez pa Joran e dianan aki.
