CAPE TOWN: No menos cu sesenta y tres pinguino africano, cu ta un especie den peligro di extincion,
a wordo haya morto debi na pica masal di abeha na un beach cerca di Cape Town. Esey ta loke e Fundacion Africa Austral pa Conservacion di Parha Costero (Sanccob) a divulga.
E abehanan a pica e animalnan aki te cu a causa nan morto, segun e veterinario Dr. David Roberts di e Fundacion a agrega.
E pinguinonan morto a wordo haya den fin di siman riba beach di Simon’s Town, cu ta como 40 kilometer leu di CapeTown. Nan tabatin hopi pica cerca di nan wowo, y tambe a mira hopi abeha morto riba beach.
Ademas di autopsia, veterinarionan lo haci otro test pa detecta malesa of substancianan toxico. Dr. Roberts a lamenta e hecho “raro y inusual” cu ta afecta un especie den peligro, pero e ta reconoce cu abehanan tambe ta forma parti di e ecosistema.
Na Zuid Africa ta biba e comunidad di pinguino africano mas importante di mundo. E especie aki tabatin un poblacion di 13.000 pareha na 2019, principalmente na Zuid Africa y Namibia.
E pinguinonan africano ta den peligro di extincion, segun Union Internacional pa Conservacion di Naturaleza (UICN).
