Aangifte inkomstenbelasting lo bay ta den forma digital

Minister Geoffrey Wever a divulga

ORANJESTAD (AAN): Minister di Finansa, Economia y Sector Primario, Geoffrey Wever, ta anuncia cu e formulario di declaracion di inkomstenbelasting proximamente lo bay conoce un cambio grandi y hopi importante. Entrante aña fiscal 2025, e formulario aki lo wordo digitalisa den su totalidad brindando asina mayor eficiencia y rapidez den procesamento di e resultadonan.

   “Mi ta sumamente contento cu nos ta cuminsa cu e proyecto importante aki y cu Conseho di Ministro di Gabinete AVP-FUTURO a aproba alocacion di Afl. 3.1 miyon pa por ehecuta e proyecto aki  y pa e trabao importante cu e profesionalnan di Departamento di Impuesto ta haciendo y lo bay haci pa por logra cu den 2026 tur ciudadano por haci nan aangifte inkomstenbelasting digital”, segun Minister Geoffrey Wever.

Automatisacion di e proceso di inkomstenbelasting ta marca un otro paso importante den e trayecto di digitalisacion y modernisacion di Departamento di Impuesto y ta brinda bentahanan significativo tanto pa e contribuyentenan como pa gobierno por ehempel: (*) Un sistema di declaracion online cu ta facil pa uza y sigur.  (*) Mayor calidad di data y miho cumplimento pa cu debernan di impuesto. (*) E procesamento di e declaracion ta sosode den un periodo mucho mas cortico y cu menos gasto administrativo. (*) E ta forma un base solido pa digitalisacion di otro procesonan, manera un mailbox digital.

   DIARIO a compronde cu dentro di poco lo start cu e proyecto di digitalisacion di e declaracion di inkomstenbelasting cual lo wordo finalisa den transcurso di aña 2026 na momento cu mester otorga e declaracion di inkomstenbelasting di aña 2025.

   Introduccion di e formulario di declaracion digital lo sosode a traves di e portal “BO impuesto” (BOi), den cual ta bay integra datonan di e registro di Censo hunto cu e sistema digital di Departamento di Impuesto. Esaki lo permiti pa henter e proceso, desde entregamento di e declaracion, sosode completamente den forma automatisa y rapido.

   Minister Wever tin un relacion di trabao estrecho cu Departamento di Impuesto y conhuntamente a encamina e proceso pa adkiri e fondonan di inversion necesario den presupuesto di Pais Aruba, pa asina por realisa e proyecto importante aki.

   Minister Wever ta gradici henter e ekipo di Departamento di Impuesto pa tur e trabaonan riba tereno di digitalisacion y pa realisacion di e proyecto di digitalisacion di e declaracion di inkomstenbelasting den 2026 y ta garantisa henter e pueblo di Aruba cu realisacion di e proyecto aki lo contribui directamente na mehoracion di e eficiencia administrativo, brinda transparencia y servicio di calidad na e ciudadanonan contribuyente.