Segun President Sindicato STA, señor Diego de Cuba:
ORANJESTAD (AAN): Presidente di Sindicato STA, señor Diego de Cuba a elabora riba e reunion recien cu Serlimar S.G. Temanan di discucion tabata e ultimo desaroyonan den e compania, di loke cu e empleadonan a entrega durante temporada di Covid, nombracionnan den compania, vuilnis toelage cu e trahadonan ta ricibi pero ta stanca pa 16 aña caba, y riba e futuro di e compania Serlimar. Segun señor de Cuba, STA a ricibi splicacion elabora for di Director, señor Robert Henríquez di kico su intencionnan y ideanan ta pa e compania.
Señor de Cuba a enfatisa cu Serlimar ta un compania hopi importante pa Aruba. Y su opinion personal ta cu a yega tempo pa Serlimar comberti den un NV na unda tin mas espacio pa desaroyo. E traspaso, segun e, lo ta e problema pasobra trahado cu mester haya entre otro aumento of bevordering, ta wordo tranca. Pa promove un contractant, el a splica, ta bay mucho mas lihe cu un ambtenaar cu mester pasa un camind’i cruz basta largo. Tambe, como un NV, e compania lo tin hopi mas beneficio pa e trahadonan.
“Haciendo e compania un NV, e trahadonan lo no perde tur nan beneficionnan cu nan tin actualmente. Pero lo por bin cu tur e beneficionan den un contracto colectivo y tambe por bin cu un structura salarial mucho mas conviniente pa e trahadonan. Derecho di trahadonan lo bira mas visibel y mas hustifica”, señor de Cuba a indica.
