A yega mainta y haya oficina di AGW Tours practicamente full destrui

A yega mainta y haya oficina di AGW Tours practicamente full destrui

Jean Carlo Espinal ta denuncia acto di vandalismo:

ORANJESTAD (AAN)-- Den entrevista cu DIARIO, e Gerente di e Compania AGW Tours, Jean Carlo Espinal cu ta situa den Aruba Water Park, a pasa den un mal experiencia, ora cu pa 6.30 or di mainta el a wordo avisa cu tin hende a drenta kibra e lugar. Ora el a yega a topa cu un acto di vandalismo basta pisa, e porta dilanti di e store, unda nan tin e front desk, full kibra.

   “Nos a cana bin y a topa full e oficina kibra y nos a pensa cu nan a drenta for di akinan. Ora cu nan a yega a kibra akinan, bolter tur cos. E punto ta masha facil, mi ta bisa, si placa bo ta kier bo ta habri busca cen bo ta bay, pero bo por mira computer benta tur caminda, y destrui practicamente e cerebro di e compania”, Jean Carlo a declara.

   El a expresa cu danki Dios awendia tur cos ta online, bo por wak via e-mail e cantidad di turista entre 8’or cu 9’or di mainta nan tin nan check in, pa e turistanan por sali bay riba tour.

   “E ta un situacion fastioso pasobra mi ta traha duro ainda, mi ta sali di akinan 12’ or di anochi, y pa casualidad ayera mi a sali di akiden 2’or di marduga. Mi bin duna un rond wak su garashi, pero no a bin eybanda pasobra tur cos tabata mustra OK. Esaki a sosode entre 6or cu 7or”, Jean Carlo a splica.

E ta mira cu ta mas un destruccion cu un  hortamento y esey a laga Jean Carlo hopi nervioso y disgusta, y ta puntra si tin hende cu por a mira algo pa yude haya e hendenan responsabel ey.

   Recherche y Forense ta haciendo investigacion y e sa cu ta bay haya e culpabelnan. El a post un video cu hopi rabia na su curazon, y p’esey e ta pidi pueblo disculpa.