A toca e tema di introduccion di protocol entre husticia y algun di e companianan di siguridad na Aruba

Minister Rocco Tjon a reuni cu asociacion di siguridad

ORANJESTAD (AAN)- Recientemente, Minister di Husticia y Asuntonan Social Sr. Rocco

Tjon a reuni y cera conoci cu e directiva nobo di Aruba Security & Integrity Services (ASIS) International Dutch Caribbean Chapter.

            Miembronan di e directiva nobo di ASIS ta consisti di Sr. Aaron Antersijn (Presidente), Sr. Marlon Richardson (Vice-Presidente), Sr. Urvin Werleman (Tesorero) y Sr. Robert Candelaria (Secretario). ASIS International ta un organisacion di siguridad internacional riba e tereno di maneho di siguridad cu centenares di departamentonan local rond mundo.

            Durante e reunion aki, a toca e punto di colaboracion entre pais Aruba y e organisacionnan gubernamental y no-gubernamental, pa loke ta trata e standarisacion den e tereno di siguridad. Un di e visionnan ta pa bin cu cursonan y certificacion pa profesionalnan, caminda a traves di e transformacion di scol di polis den un Academia di Husticia, e parti aki por haya aun mas contenido conhuntamente cu ASIS.

            Banda di esaki, kier mira mas “beleid” y “wetgeving” tambe riba e tereno di siguridad. Importante pa nota ta cu siguridad den e contexto aki no ta solamente siguridad fisico pero tambe “cyber security”.

            Tambe, a toca e tema di introduccion di protocol entre husticia y algun di e companianan di siguridad aki na Aruba, caminda ta trata di un colaboracion mas estrecho entre esakinan unda cu conhuntamente por combati criminalidad aki na Aruba. Segun e Mandatario, esaki tawata e prome di varios reunion na caminda unda cu lo enfoca riba un miho colaboracion.