A.T.A. a lansa documentario "Blue Lizard Effect" cu protagonista local y internacional

Reconocido speaker Jason Silva ta e protagonista

 *Aruba ta asina e escenario unda cu ta papia di e topico di un bida feliz 

ORANJESTAD (AAN): Durante un anochi bou di streanan na Parke Arikok, den presencia di bishitantenan special, productornan y participantenan di e documentario, A.T.A. a presenta na un manera exclusivo e documentario di “Blue Lizard Effect”. Un serie documental revolucionario cu ta profundisa su mes den e mundo fascinante di Aruba, pero di un angulo diferente; e serie ta explora e concepto energetico di felicidad y e conexion profundo cu e cultura, e hende, y naturalesa di e isla ta provee pa cu esaki. Aruba ta asina e escenario unda cu ta papia di e topico di un bida feliz y con pa enfoca riba esaki.

            Protagonista Jason Silva, un personahe renombra den e mundo di television, conoci pa su storytelling, orador di diferente conferencia importante, y creador di película, nomina pa Emmy, ta na un momento puntual di su bida y ta en busca di un transformacion y den mihor compronde e esencia di un bida feliz.

             Jason ta haci esaki na Aruba pa haya sa e motibo dicon e ta ser yama 'E Isla Feliz'. E motibo di felicidad di su habitantenan y con e por siña di cada un di e personanan cu e ta encontra y con esaki por yud’e pa asina e tambe por logra e transformacion personal.

            E documentario ta conta cu diestres local entre otro, Daexo Croes, Rolly Bislik, Kyra Hoeverts, Nichole Danser, Harold Kelly, Trudy Lampe, Watra, Armando Goedgedrag, Ethan Westera, Natusha Croes, Nathaly de Mey, Ciro Abath cu ta mustra Jason nan manera di biba, pakico nan ta sinti nan mes feliz, y con e elementonan ta mantene nan bibo y activo.

            E serie ta conta cu cuater episodio cautivante segun e cuater elementonan natural:

Episodio 1 - Awa: Bula den e presente mientras Jason Silva ta explora e importancia di biba riba un isla Caribense manera Aruba. Descubri e influencia profundo di e laman segun cultura y identidad Arubiano den wowo di tres persona local cu ta inspira y conecta cu e forsa elemental aki.

Episodio 2 - Tera: Den e episodio di Tera, Jason Silva ta uni su mes na buskeda pa redefini felicidad mientras cu e ta explora e origen historico y mistico di Aruba. Segun exploracion di pasado di e isla, Silva ta cuminsa un biahe di auto-descubrimento y iluminacion.

Episodio 3 - Biento: Sinti e forsa elemental di e biento mientras Jason Silva ta encontra cu e importancia di aire den formacion di e identidad di Aruba y su concepto unico di felicidad. Explora con e paisahe di e isla ta wordo forma segun forsanan di naturalesa, lagando un marca permanente riba su hende.

Episodio 4 - Candela: Encontra cu e poder transformador di candela mientras cu Jason Silva ta revela e esencia di e "Blue Lizard Effect" y su impacto profundo riba evolucion di Aruba. Experiencia e origen di e isla y e spirito di renovacion constante y transformativo. 

            Entrante 17 di april 2024 por mira e documentario via MAX. Alabes, via Warner Channel pa 8or di anochi pa cuater diamars consecutivo cu ripiticion riba diahuebs 11:30 di mainta na paisnan di Colombia, Aruba, Ecuador, Argentina, Peru, Chile, Venezuela. TNT: 6:00 PM pa cuater diamars consecutivo cu ripiticion riba dialuna 11or di mainta na paisnan di Colombia, Aruba, Chile, y Argentina.

             Por ultimo na Discovery 4:30 di atardi pa cuater diamars consecutivo cu ripiticion riba diabierna 8:30 di mainta na paisnan di Argentina, Brasil, Colombia, Ecuador, Peru, Venezuela, y Chile.