A.T.A. a finalisa siman di reunionnan strategico den Europa

ORANJESTAD (AAN): Aruba Tourism Authority (A.T.A.) a finalisa un siman di reunionan importante na Europa,

   caminda cu a combina sesionan interno strategico cu presentacionan di diferente agencia di “advertising” specialisa den e mercado di Europa -como parti di un evaluacion integral di A.T.A. su strategia di “advertising” pa e region.

   Durante e siman, e ekipo a participa den sesionan enfoca riba A.T.A. su “Multi-Anual Corporate Strategy” (MACS) cu ta acapara aspiracion pa cu desaryo di nos turismo te cu 2035. Enfoce tabata riba e obhetivonan y accionnan concreto delinea pa e aña aki y pa 2026 entre otro. Aki a delinea y describi e papel di A.T.A. Europa y su actornan den logra metanan stipula. 

  A.T.A. ta traha cu varios agencia internacional pa asina posiciona Aruba den diferente pais. Un parti standard di A.T.A. su operacion ta pa evalua e funcionamento di cada agencia y pa habri un proceso di “bidding” cada pasa tanto aña. Como tal parti di e agenda a inclui finalisacion di un proceso di ‘evaluacion extenso’ a base di un destaho pa asina determina e agencia cu lo continua cu A.T.A. y traha hunto cu nos organizacion riba posicionamento di Aruba na Hulanda y den diferente mercado na Europa.

   Proceso asina ta wanta A.T.A., Aruba y agencianan cu ta representa Aruba skerpi. E ta condusi tambe na mehoracion den strategia dirigi riba cada mercado. Mas cu claro A.T.A. ta keda dirigi y delinea na kico mester atene nan mes y pues kico e strategia integral y metanan grandi pa Aruba ta, esaki pa medio di e “Request for Proposal” (RFP) formal cu ta presenta na agencianan cu a logra ta parti di e lista final. ‘DEPT’ ta e agencia actual pa Aruba den e mercado Europeo.

   E siman tambe tabata un cu significado emocional, mirando cu e team di A.T.A. Europa a uni forsa pa duna un despedida yena di cariño na Sharmin de Vries, cu despues di diez aña trahando pa e organizacion, lo bay cuminsa un capitulo nobo como un profesional independiente. Ehecutivonan di Aruba a gradisi Sharmin y e ekipo completo pa e dedicacion y labor desplega.

   Hecho ta cu Europa ta sigui ta un mercado unda ta desea di crece, como parti di diversificacion di mercadonan pa Aruba. E situacion actual na Merka tabata parti di e agenda, cu a enfoka riba crea un plan di contingencia pa Aruba unda Europa lo por hunga un papel den esaki.

   A.T.A. lo sigui traha riba esaki den e proximo dianan pa asina delinea kico Europa lo por kiermen si e situacion na Merka impacta fluho di bishita pa Aruba negativamente. E meta pa Europa pa 2025 ta un crecemento di 2.5% di huespednan cu ta yega e isla.