A rescata ocho mucha cu tabata biba den un auto yena cu sushi

TIJUANA, Mexico: Un total di ocho mucha Mericano, entre nan un baby, cu tabata biba den un auto, a wordo rescata Diahuebs door di oficialnan di Polis na Tijuana, na Mexico.

   E canal di Univision a bisa cu e muchanan aki a wordo salba danki na testigonan cu a dicidi na yama autoridad Mexicano pa denuncia esaki.

   E muchanan tabata biba den e auto hunto cu nan dos mayornan, pues un total di 10 hende den e auto chikito aki.  Bon mes cu ciudadanonan a duna tip na Polis, cu autoridad di Policia Municipal a bay investiga den bario Libertad y descubri esaki.  A bin sali na cla cu e muchanan no ta haya cuminda tampoco di nan mayornan.

   E muchanan tin edad di 15, 11, 7, 6, 5, 4, y 2 aña, y un baby di 7 luna.  Nan tur tin nacionalidad Mericano. E situacion tabata preocupante, pasobra e auto aki, ademas di sushedad y cuminda putri, tabata yena cu insecto cu tabata pone salud di e muchanan na peligro.

   Debi na esaki, e mayornan a wordo aresta door di Polis di Tijuana.  A detene Beatriz N. di 35 aña di edad, un ciudadano Mericano cu adres na Los Angeles.  Tambe Jesus N. di 40 aña, un ciudadano Mexicano cu adres na Tijuana.  Nan lo wordo interoga pa haya sa pakico nan no tabata dunando cuminda na e muchanan.

   E muchanan a wordo poni bao custodia di un Cas di Servicio Infantil, unda mesora nan a haya cuminda, cos di bebe, paña limpi, y a bay check nan cabey si acaso nan por tin pieu den nan.  Tambe awor autoridad ta bay check e situacion legal di e mayornan.