A reconoce ganadonan di e Standing Ovation Award di Aruba Tourism Authority

Despues di tur e High-Fives ricibi for di coleganan den 2022:

ORANJESTAD (AAN): Recientemente Oficina di Turismo, A.T.A. a reconoce tres empleado pa e trabao eherci den aña 2022, esaki a traves di e di 4 edicion di Standing Ovation Award.

   A reconoce e tres empleadonan cu a ricibi mas punto for di coleganan. Coleganan ta duna otro High-Fives basa riba diferente accion y balornan cu A.T.A. ta para pa nan. Di e forma aki ta duna tur empleado e mesun oportunidad pa worde reconoci door di nan coleganan.

   Na di tres luga cu mas hopi punto a sali Marouska Heyliger, Visitor Care Liaison. Marouska a ricibi diferente High-Five y comentarionan basa riba su disponibilidad y entusiasmo pa ta parti di diferente proyecto, como tambe su rol di setup e “booth” di Aruba, Bonaire y Curacao na conferencianan di crucero.   Reconocemento special a bay pa e proyecto di buki cu e tabata encarga cu n’e aña pasa, unda a ricibi donacion di buki di bishitantenan riba crucero y a entrega esakinan na diferente scol como tambe na Biblioteca Nacional. 

   Na di dos luga cu mas hopi punto a sali Josette Croes, Trade Relations Supervisor. Josette a sali na di tres luga di e Standing Ovation Awards na 2020 y na 2022 su coleganan a bolbe dun’e hopi High-Fives y asina el a yega den e top tres un biaha mas. Josette a ricibi High-Fives pa su esfuersonan y contribucionnan pa asisti coleganan di diferente departamento cada biaha cu mester di cualke tipo di asistencia, como tambe pa su trabao den e Social Committee di A.T.A.

   Na di prome luga cu mas hopi punto a sali Marisol Sanchez Maldonado, PR & Corporate Communications Specialist. Marisol a ricibi High-Fives for di su coleganan pa diferente iniciativa, incluyendo e serie di Podcast “A.T.A. Talks About” cu a worde lansa den 2022, iniciativanan den comunidad como tambe envolvimento cu coleganan.

   Gerencia di A.T.A. ta sumamente agradecido pa e esfuerso y trabao di cada un di e miembronan di e ekipo y ta felicita un bes mas e ganadonan di e Standing Ovation Awards 2022. Mester remarca tambe cu esaki ta e aña cu e cantidad total di High-Fives tabata mas halto, pues mas colega ta haciendo uzo di e sistema aki pa duna coleganan High-Fives.