A logra kibra un contract desfaborabel pa Aruba cu Canadian Bank Note

Minister Croes: "a rescata Fundacion Lotto pa Deporte"

*Contract tabata firma cu valides te na aña 2035 

ORANJESTAD (AAN): Dialuna mainta, tabata un conferencia di prensa unda a haci un anuncio importante relaciona cu Lotto pa Deporte. Durante di esaki tabata tin presencia di mandatarionan, parlamentarionan, representantenan di Raad van Toezicht di Fundacion Lotto pa Deporte  y demas invitadonan pa asina por a scucha e anuncio importante aki.

            Minister di Deporte y Enseñansa, Endy Croes a duna di conoce cu esaki ta un anuncio historico pa e mundo di deporte na Aruba. Ta asina cu despues di negociacionnan fuerte cu Canadian Bank Note, a logra rescata Fundacion Lotto pa Deporte.

            El a bisa cu awor Lotto pa Deporte ta bira bek di pais Aruba, di pueblo di Aruba for di dialuna en adelante.

            E mandatario a sigui bisa cu e vision di gobierno ta cu e deportistanan mester ta central den cualkier proceso. Pesey a percura pa negocia y a logra di kibra un contract desfaborabel pa Aruba cu tabata firma te na aña 2035.

            A renegocia esaki den buena boluntad, Croes a expresa, cu Canadian Bank Note y den e proceso aki a logra bolter e contract aki bek na fabor di Aruba. Esaki a bira un contract husto cu lo sirbi deporte y e deportistanan na final.

            Na 2011, bao Gobierno di Mike Eman, a firma un contract cu Canadian Bank Note y a traspasa e operacion den su totalidad pa Canada na un manera hopi desventahoso, a bisa.

            Prome cu 1999, Fundacion Lotto pa Deporte tabata bende loteria ariba papel. Na 1999 a cera contract cu e compania canades pa asina por a digitalisa esaki na un forma di innovacion. Den e proceso aki, di 1999 pa 2010 (11 aña largo), e compania di Canada su contract cu Lotto pa Deporte ta pag'e fo'i e benta bruto 8.25% pa e 'management fee' pa e servicio di tecnologia y e resto ta bay pa premio, comision, operacion y e restante tin cu yega pa deporte.

            Desde 2011, bao di un scenario cu a wordo crea, a percura pa cambia esaki y a duna Canadian Bank Note e operacion completo. Pa cu esaki a agrega cu ariba e 8.25% a bin adicional, 15.25%. Kiermen cu for di 2011 te cu dialuna, Canadian Bank Note no solamente tabata haci tecnologia, pero tabata opera Lotto den su totalidad y p'esey e ta cobra 23.5%, cu ta hopi placa pa e 'operating expense', Endy Croes a indica.

            Pa medio di e jaarrekenningnan di Lotto por a worco comproba e embergadura di e acuerdo aki.