ORANJESTAD(AAN): Diamars riba Dia Mundial contra Trafico Humano, a tuma lugar lanzamento di e pakete educacional riba Traficacion y Contrabando.
E pakete ta bay wordo duna na scolnan secundario y durante un conferencia di prensa Angela Persad, lider di proyecto di Coordinatiecentrum Mensenhandel Mensensmokkel Aruba (CMMA), a trece dilanti cu trafico humano y contrabando di hende ta un problema creciente y compleho.
El a sigui bisa cu riba tur nivel ta necesario pa trece informacion y bon conocimento di e tema pa dilanti, pa por sigui na bon manera cu e lucha contra trafico y contrabando humano.
“E pakete di les a wordo desaroya riba peticion di CMMA, mientras cu e campaña ‘Habri Bo Wowo’ cu a cuminza na 2021 tabata caba un bon comienzo riba esaki”, segun Persad.
El a sigui bisa cu e pakete di les ta haci uso di e pelicula cortico, Otro Banda di Laman, pa informa e alumnonan riba traficacion y contrabando humano y con pa nan reconoce esaki.
Meta di e pakete di les ta pa por papia cu e alumnonan por riba e tematica aki.
Durante e conferencia di prensa Prome Minister Evelyn Wever Croes tambe a hiba palabra.
El a trece dilanti cu te ainda tur aña riba 18 di October a para keto riba e tema di trafico humano y cu mester sigui para keto na dje tambe.
“Esaki ta importante pa por trece concientizacion pa nos comunidad riba e topico di traficacion y contrabando di hende”.
Esaki ta un tipo di esclavitud moderno, traficacion di hende ta un delito contra derechonan humano, pues ta responsabilidad di nos tur pa combati esaki, segun e Prome Mandatario.
El a sigui bisa cu lamentablemente rond mundo miles di persona anualmente ta bira victima di traficacion humano.
“Mayoria biaha e victima ta wordo isola socialmente y ta wordo separa di su amistadnan y su famia, haciendo e persona mas vulnerable na abuso”.
Como gobierno responsabel di un pais, nos no por laga un fecha asina pasa, sin trece atencion un biaha mas na e topico aki, segun Wever Croes.
El a indica cu lamentablemente na Aruba tambe nos ta wak diferente caso di trafico humano y pesey e pakete aki ta bay ta hopi esencial den trece concientizacion mas ainda.
https://diario.aw/categories/noticia/general/a-lanza-pakete-educacional-riba-traficacion-y-contrabando-humano#sigProIdbb0fe4f9a6
