Dalgis Montalvo, coordinador di HUNTO:
ORANJESTAD (AAN) – Na Juni aña pasa, a cuminza un proyecto unda AZV a pone un budget disponible, hunto cu Rampen Bureau, pa por a takel e listanan di spera di Respaldo.
Den entrevista cu e coordinador di HUNTO, señora Dalgis Montalvo, el a splica cu e proyecto aki a bin pa mitiga e listanan aki. Na momento cu e proyecto aki a inicia tambe a cuminza cu un sistema di registracion, unda cu aworaki por a duna Hunto e cifranan précis di kico a tuma lugar, cuanto cliente a bin, cual ta e edadnan cu a bin dilanti, y tambe a duna resultado pa haya sa si e proyecto aki mester sigui of no.
Den cuadro di esaki, Dalgis a indica cu te cu Maart di e aña aki tabata tin un total di 434 caso cu a drenta, pa un average di mas of menos verwijzing pa luna. Esaki a cana hunto cu e maneho nobo y tur dokter di cas a wordo informa di e maneho nobo aki unda ta defini ki momento ta referi un persona pa cuido basico y ki momento ta bay pa cuido specializa.
El a señala tambe, cu tabata tin cuater grupo di edad cu tabata e top. Entre edad di 11 pa 15 aña tabata tin un total di 77 mucha. E di dos grupo ta 56 hoben di edad di 16 pa 20 aña y e di tres grupo ta mucha den edad di 6 pa 10 aña, cu 43 mucha. E di cuater grupo ta 32 adulto entre 36 pa 40 aña.
El a agrega cu for di e 434 caso aki solamente siete a rekeri di cuido specializa, pues cu tabata tin mester di un psiquiatra, y nan a wordo manda directamente pa Respaldo, manera tabata e palabracion.
“Esey no ta bisa cu un ta mas importante cu otro, pero si cu e proyecto aki a demostra e necesidad cu tin eyfo. E no ta un servicio cu a wordo propaganda, pero si ta mira e necesidad den e dokternan di cas, ya cu tur caso a drenta cerca nos via di nan. Pues ta wak cu e necesidad ta grandi y e ayudo necesario”, Montalvo a señala.
E motibo ta cu e servicio di Psicologia no tabata inclui den e pakete di AZV, pues hopi hende tabata tin necesidad di un psicologo, pero hopi biaha ta asina cu e persona aki tin cu cubri cuminda pero alavez e mester di un psicologo. Kico e ta pone e ora ey como prioridad? Pues, aworaki a duna e personanan e oportunidad pa busca ayudo aunke e ta un poco limita pasobra durante e proyecto aki por mira cu tin necesidad pa mas psicologo, mirando e peticion.
