Parlamentario di Fraccion di MEP, Hendrik Tevreden:
ORANJESTAD (AAN): Dialuna a inicia cu e asina yama "Contactplan' cu a dura henter dialuna. Esaki tabata un 'vierlanden overleg' entre Aruba, Corsou, Sint Maarten y Surinam.
Parlamentario di Fraccion di MEP, Hendrik Tevreden a splica cu pa hopi tempo, e contacto entre e cuater paisnan aki a bay riba un paro. Sinembargo, mirando e desaroyonan economico y e logistica den Caribe, a haya cu ta bon, pa inicia bek e 'contactplan' aki, entre e parlamentarionan, pero tambe entre e gobiernonan.
Tevreden a sigui bisa dialuna den parlamento a inicia e reunion entre Aruba, Corsou y Suriman. E reunion aki tabata for di mainta y a cera atardi c'un 'networking'. E meta di esaki ta pa por cera un aliansa nobo, un contact nobo entre e paisnan di Aruba, Corsou, Sint Maarten y Surinam.
For di tempran, a reuni den sala di Parlamento, unda cu e Presidentenan di e Parlamentonan di Aruba, Corsou y Sint Maarten a habri e reunion y a yama bon bini na tur presente. Lider di Fraccion di MEP a premira esaki como un dia hopi productivo.
Meymey di e reunionnan entre e parlamentarionan, tambe a invita Gobierno pa asina combersa riba nan plannan y nan proyectonan na pais Surinam, principalmente. Pero tambe a tende di e delegacion di pais Surinam kico ta nan plannan economico cu nan tin y kico nan kier logra cu paisnan Aruba, Corsou y Sint Maarten.
"Mi ta kere cu e ta un oportunidad hopi grandi pa por haci negoshi entre e paisnan aki. Nos sa cu pais Surinam ta un pais rico na agricultura y aworaki ta den noticia pa un di e posnan di petroleo mas grandi cu tin den e region. Ta calcula cu ta mas o menos 700 miyon bari cu lo por trece pa Surinam cada aña 28 miyon dollar na entrada extra", a bisa.
Esaki ta algo hopi interesante y e intencion tabata pa scucha mas di e desaroyo aki. Pa Aruba tambe ta importante den cuadro di e echo cu ta buscando un pilar economico, sigur den e tereno di agricultura. Surinam ta un 'key player' den esaki, e parlamentario a señala.
Pa loke ta turismo, a invita Minister Dangui Oduber pa asina por a duna su presentacion riba e vision turistico di Aruba pa asina por logra cu e turistanan afluente di Surinam por bishita Aruba y ta parti di e cadena di turismo di e isla.
Minister di Economia Geoffrey Wever tambe a haya invitacion pa presenta su vision como tambe Minister di Enseñansa Endy Croes pa mira kico lo por logra entre e paisnan aki conhuntamente.
Hendrik Tevreden a sigui bisa cu Parlamento di Aruba ta kere cu e contactonan aki ta importante y cu lo por reforsa e lasonan di amistad existente. Aworaki ta mira kico ta e posibilidadnan pa pais Aruba den mercadonan nobo manera esun di entre otro, berdura, fruta, etc.
E parlamentario a finalisa bisando cu kier mantene comunidad informa di e reunion aki. "Nos ta sigur cu e 'contactplan aki no lo ta e prome, ni e ultimo. Pero lo bira un continuacion di aworaki pa futuro pa asina crea lasonan importante den nos region.
