A felicita Stichting Hunto cu Conferencia di “Breaking the Silence - Let’s Stop Bullying”

Minister Gerlien Croes

ORANJESTAD (AAN): Diamars mainta na Renaissance Convention Center, a tuma luga e apertura di e Conferencia di “Breaking the Silence - Let’s Stop Bullying”, organisa pa Stichting Hunto. E conferencia tabata specialmente pa tur esnan cu ta den e veld di educacion y formacion social. Minister di Relacionnan den Reino, Enseñansa, Hubentud, Innovacion y Deporte, Gerlien Croes tabata un orador e mainta aki tambe. Minister Croes, ta felicita Stichting Hunto cu e iniciativa aki cu ta uni diferente otro instancia.

   Minister Croes a expresa cu ta hopi importante pa papia abiertamente tocante un topico asina importante cu ta afecta salud mental di nos hobennan. Bullying y salud mental mundialmente ta den desaroyo inmenso y tin impacto inmenso riba nos muchanan. Especialmente den nos era digital na unda cu bullying ta continua riba medianan social.

  E mandatario a remarca cu e problema aki, no solamente ta cuminsa na cas pero medianan social ta hunga un rol hopi grandi den esaki. Gobierno di Aruba ya a entrega su plan di accion di e structura di cuido den enseñansa. A pone medionan disponibel pa mas psicologo. Tambe ta proyecta pa yega na mas trahador social mirando cu no tin suficiente mientras cu e retonan ta bira mas grandi cada biaha.

   Segun Minister Croes, esaki no ta un responsabilidad solamente di Gobierno di Aruba. E ta un responsabilidad di comunidad. Pasobra Gobierno por pone hopi trahador social, pero si mayornan, famianan, comunidad henter no realisa kico e problema ta nifica pa Aruba, e ciclo ta keda ripiti. Pero e structuranan di parti di Gobierno mester ta garantisa pa duna e sosten necesario.

   “Di parti di Gobierno di Aruba, mi ta hopi gradicido cu nos por a duna nos aporte na e conferencia di Stichting Hunto. Esakinan ta iniciativanan cu mester sigui ripiti”, Minister Gerlien Croes a conclui.