ORANJESTAD (AAN): Manera cu DIARIO a trece den edicion di Diahuebs caba, tabatin un area grandi sin coriente riba Diaranson atardi debi na un accident di trafico.
E accident aki a socede na Brazil, unda un vehiculo a bay dal riba e palo di luz y a ocasiona daño, special na un kabel di coriente.
Informacion nobo cu DIARIO a ricibi ta indica cu e fayo di coriente aki a dura basta, y te despues di 9:00 pm tur hogar y negoshi a haya coriente bek.
Esaki a afecta clientenan di NV Elmar den e area di Brazil, Rooi Kochi y vecindario: Debi na un accidente di auto, cu a reverse y dal contra un palo di luz nan a confronta un interupcion den e distribucion di coriente den e area.
Tecniconan di NV Elman a mobilisa pa atende cu esaki, y pa 3:33 pm nan a cuminsa cu e proceso pa isola e problema pa asina por reestablece e suministro den mayoria di e area afecta.
Despues a cuminsa cu e proceso pa bay drecha e palo di luz, y rek tur wayanan di coriente bek.
Ya pa 3:46 pm, suministro di coriente a ser reestableci den mayoria di e area afecta. Pero e area cerca di e palo di luz, esaki a keda keto bay sin coriente. E ora numa e trabao di reparacion lo inicia awor pa por reestablece den e resto di area afecta.
Como 3 ora despues, e team di Overhead Services a caba di planta un palo nobo di luz pa asina e team di Underground Services por conecta e poste di coriente aki back na e grid di distribucion.
Despues nan a zwaai e liñanan di distribucion y instala e componentenan di coriente back na e poste.
Banda di 8:46 pm nan a desconecta e linea di voltahe halto, pa asina NV Elmar por reconecta e wayanan di palo nobo di luz.
Despues finalmente pa 9:02 pm, suministro di coriente a worde reestableci den tur area afecta. Tur cliente pues e ora a haya servicio di coriente bek.
