MANIZALES: Autoridadnan y organizacionnan di rescate a cuminza cu evacuacion di 40 famia cu ta biba den e zona di riesgo halto di e volcan Nevado del Ruiz,
den centro di Colombia, despues cu e actividad sismico a aumenta aun mas, obligando nan di hisa e alerta na ‘Nivel Oranje’ pa cu un posible erupcion.
E nivel di alerta Oranje a wordo declara siman pasa pa cu un posible erupcion den e siguiente dia- of simannan, segun Servicio Geologico Colombiano.
Cerca di e sero tin algun hende ta biba den zonanan unda no tin comunicacion, no tin forma tampoco cu si erupcion cuminza, cu nan por wordo evacua rapidamente, y pesey ta mihor preveni pa evacua nan di awor.
Pero den henter e zona di volcan Nevado del Ruiz, tin como 57.000 persona ta biba den 22 municipio di departamentonan di Tolima, Caldas, Risaralda, Valle del Cauca, Quindío, y Cundinamarca.
Famianan cu ta biba den un radius di 15 km, e zona mas cerca di e crater di e volcan, ta core riesgo di bay haya fluho di gas y fragmento di piedranan volcanico den un posible erupcion, y tambe posible avalanchanan di lava manera a socede na 1985. E tempo ey e volcan a saca cantidad grandi di lava y gas cayente, cu a smelt tur e sneu cu tin rond di e cabez, causando un avalancha enorme cu a inunda pueblo di Armero, causando morto di como 25.000 persona, cu tabata e peor tragedia natural den historia di Colombia.
Den proximo dia, como 500 famia mas lo por wordo evacua di e zona.
