Parlamentario Alvin Molina (MEP):
ORANJESTAD: Pa via di mal maneho ambtenaarnan mester perde tempo pa bringa caso den Corte. Y no solamente tempo, pero tambe energia y hasta placa pa paga abogado. Esaki ta resulta den malcontento, demotivacion, disminucion di productividad y consecuentemente no ta ofrece un servicio optimal na pueblo di Aruba.
E parlamentario a indica cu den su añanan den Cuerpo Policial Aruba, el a experencia masha hopi caso cu coleganan simplemente no ta ricibi e trato, e posicion huridico cu nan merece. Causa di esaki ta simplemente: mal maneho. Mal ‘personeels management’ den e departamentonan, mal maneho den DRH. Pa por drecha e situacion aki gobierno mester tuma pasonan necesario, para duro pa hefenan di departamentonan organisa nan ‘personeelszorg’ manera debe ser y pa DRH cuminsa haci loke a wordo diseña pa haci cu ta conseha hefenan di departamento y Minister pa despues ehecuta loke hefenan y Minister a dicidi cu ta necesario pa por sirbi pueblo di Aruba.
"Mi mes tin basta tempo ta bisa caba cu bedrijfsvoering y specialmente personeelsmanagement ta e parti primordial pa nos por drecha e servicio di Gobierno. Hende cu ricibi loke nan merece lo ta mas productivo. Ta sumamente importante pa DRH ehecuta su rol como e autoridad riba personeelsmanagement manera mester ta. Hefenan di departamento y minister ta dicidi ‘kico’ mester pasa, DRH ta conseha y ta percura ‘con’ ta realisa e maneho", e parlamentario a splica.
Ta basta aña caba cu ambtenaarnan no ta ricibi e trato cu nan merece, ta basta aña caba cu departamentonan no ta funcionando optimal pa via di esaki y ta basta aña pueblo di Aruba no ta ricibiendo e servicio optimal, mientras cu tin espacio pa drecha esaki. A bira tempo pa reorganisa personeelsmanagement den full gobierno. Esnan cu no por carga e responsabilidad mester traha luga pa otronan por haci e trabou.
