84 caso activo registra te Diabierna ultimo pero positivity rate ta aumentando

Minister Presidente cu cifranan covid-19:

ORANJESTAD (AAN) – Prome Minister Evelyn Wever-Croes a referi na e tema di Covid-19, den conferencia di prensa di Gobierno, Dialuna.

E mandatario a bisa cu si mira e cifranan cu a wordo publica Diabierna ultimo (manera ta conoce gobierno ta publica solamente riba Diabierna), cu ta mustra cu tabata tin solamente 84 caso den un siman, loke e mandatario ta mira como un mehoracion liviano, di e siman prome cu tabata tin 87 caso activo.

Esaki ta mustra cu Aruba ta bayendo den bon direccion. Cu ta manteniendo e cifranan; e cantidad di personanan hospitaliza ta dos, y no tin pashent den cuido intensivo, localmente.

No obstante e dignatario a bisa cu por nota cu e positivity rate ta aumentando un tiki loke ta mustra cu e virus tey ainda, y cu ta importante pa nos cada un cuida.

“Ora cu nos mira tambe e vacunacion, cu ta keda e manera mas efectivo pa nos proteha nos mes, nos ta mira cu pa loke ta esnan riba 60 aña ya caba tin un grado di vacunacion di e prome dos vacunanan  di 86%, y e di tres vacuna 51%”, Minister Presidente a menciona.

E mandatario a subraya cu por mira cu e dos prome vacunanan a bay hopi bon, pero despues e interes a, manera baha, un poco. E populacion di riba 18 aña, tin un grado di vacunacion di e dos prome vacunanan di 79% y si conta e di tres acerca nos ta apenas na 33%.

Encuanto e di cuater vacuna, of e di dos booster, e ta accesible tambe pa esnan riba 60 aña y esnan riba 18 aña cu tin problemanan cu salud of tin salud delicado, tambe ta disponible. Apenas cerca di mil persona a busca e di dos booster, Minister Presidente a indica.

“E vacunanan tey, nos tin un sistema di vacunacion accesible pa tur hende y e ta gratis ainda. Y di akinan mi kier haci un apelacion riba un y tur pa nos sigui vacuna. Si nos mira e cifrananan, por ehemplo na Curacao, nan ta riba 500. Aki na Aruba nos ta rond di 80. Un par di siman pasa nos tabata rond di 40, esey kiermen cu covid tey y e incidencia ta aumentando”, Minister Presidente a remarca.

El a agrega cu tur dia por vacuna den siman, den oranan di trabao, na DVG na Playa. Nan tin un espacio especial pa vacunacion, y tambe via e unidad movil, cu e siman aki no ta bay ningun caminda debi na trabaonan di mantenimento riba dje, y dia 20 di April e lo ta na Noord, na Compleho Deportivo Frans Figaroa.

Eynan lo keda pa un siman y pico mira con e interes ta y despues lo move bay otro caminda. E dignatario a haci un invitacion na henter comunidad pa sigui vacuna. Minister Presidente a señala cu gobierno ta sigui e desaroyonan internacional y te ainda no tin indicacion cu Aruba mester ta preocupa pa otro variante, of aumento di casonan, pero nos tin cu wak si 84 caso activo na e momentonan aki y tur ta potencial pa sigui pega otro hende.