77 Alumno di Examen Klas a gradua na Colegio San Antonio

Diahuebs a haya resultadonan:

ORANJESTAD (AAN)-- Diahuebs atardi docentenan, alumnonan di Examen Klas y nan mayornan, a ricibi resultadonan final den un ambiente yen di alegria y dorna cu hopi colorido.

Director Meneer Lee a pidi nan tur cu a warda den e cura di sol bin mas cerca di e tarima, unda un docente a yama e alumnonan cu a slag.

“Awe nos p or celebra e resultadonan cu a wordo logra, nos ta reconoce unda tin espacio pa mehoracion, y hunto nos ta asumi e responsabilidad. E no tabata un aña facil, pero nos a pusha y persevera. Nos ta contento di celebra cu 77 alumno a gradua pa nan MAVO Diploma. Na mes momento nos ta desea esnan cu tin chens pa gradua den e segundo tanda, hopi exito. Pabien, Pabien!” ta palabranan di e director señor Lee.

Señor Lee den un par di seconde a splica DIARIO cu 35 alumno lo mester bay den e di dos tanda. Hopi pabien na un y tur y hopi exito den futuro, di parti di DIARIO tambe, y nos miho deseonan pa e alumnonan cu lo bay den e di dos tanda.