31 di Januari proximo ta e 'deadline' pa paga impuesto 2025 riba plach'i auto

Meverly Romano, PR di DIMP:

*DIMP no ta bay hala e fecha mas! 

ORANJESTAD (AAN)—Esaki ta un temporada sumamente druk pa Departamento di Impuesto. Asina señora Meverly Romano, Relacionista Publico di DIMP a menciona, den un entrevista cu DIARIO, tocante e impuesto riba plach'i number.

            Romano a expresa cu esaki no ta e prome biaha cu nan ta pasa den esey, y nan ta preparando p’e. Na locual el a pone enfasis riba dje, ta pa e contribuyentenan prepara pa haci e pago, pa e seguro ta na ordo. E ultimo dia pa paga e belasting 2025 ta 31 di Januari proximo, y DIMP no ta bay hala e fecha mas.

            “Nos no ta bay hala fecha mas, manera den pasado. E no ta bira dia 10 ni 15 di Februari, pasobra nos a habri e posibilidad di pago na September caba. Kiermen, e personanan a haya chens desde September pa paga minimo di 50 florin pa luna, di tal forma cu ora fin di Januari yega nan tin e belasting di, por lo menos, mitad di aña paga. P’esey, esnan cu kizas ta pensa cu nos ta bay hala fecha, no! Esey  no ta bay sosode mas”, Meverly Romano a enfatiza.

            Romano a agrega cu e maneho di boet ta keda valido. Si 1 di Februari habri y e persona no a haci su pago, e boet ta 50% di e mitad aña. Pues si e contribuyente su belasting mitad di aña ta 150 florin, e boet ta 75 florin.

            “Esaki ta cosnan pa tene cuenta cu ne. E boet no ta algo necesario, pero si ta un medio pa forsa e persona pa e por cumpli na tempo. Y mas cu postpone e pago, mas gasto e persona ta bay tin, p’esey tur tempo nos ta pidi nos contribuyentenan pa tene cuenta cu e fechanan final. E 'deadline' ta yegando, no laga esaki pasa, etc., pa evita cu e persona tin cu paga di mas”, Meverly Romano, PR di DIMP, a remarca.