18.262 trahador lo beneficia den mehoracion di nan poder di compra

Prome Minister Mike Eman:

ORANJESTAD (AAN): Gobierno di Aruba a anuncia un serie di ahuste concreto cu tin como meta fortifica e poder di compra di miles di ciudadano riba nos isla, cu enfoke special riba e trahadonan cu entrada mas abou y gruponan cu ta sinti mas fuerte e impacto di aumento den costo di bida. “Pa nos ta sumamente importante cu crecemento economico no keda solamente den cifranan, pero cu nos pueblo tambe por sinti e mehoracion den nan bida diario,” Prome Minister Mike Eman a expresa.

18.262 trahador lo beneficia den mehoracion di nan poder di compra

Un di e puntonan principal cu Gobierno ta introduci un aumento di reparatietoeslag pa e trahadornan cu un entrada di salario minimo Segun e cifranan presenta door di Directie Arbeid & Onderzoek (DAO), e grupo aki ta representa un total di 18.262 persona den sector priva, ekivalente na 37.4% di tur trahado den sector priva.

“Nos ta papia aki di un grupo hopi grandi den nos comunidad. Tin hopi hende cu, a pesar di e crecemento economico di pais, no semper a logra mira un aumento significativo den nan poder di compra y cu ta pasando den momentonan dificil,” asina e Prome Minister a indica.

Segun e informacion comparti durante un momento cu prensa, e grupo di trahado cu lo beneficia ta inclui:

• 5.554 persona cu ta gana menos cu salario minimo;
• 4.389 persona cu ta gana salario minimo;
• 8.319 persona cu tin un entrada entre salario minimo te cu Afl. 2.500.

Den total, 8.187 homber y 10.075 muhe lo beneficia di e ahuste financiero. E cifranan presenta ta mustra tambe cu e mayoria di trahadonan cu entrada mas abou ta concentra den sectornan manera servicio comercial, horeca, retail, lodges y construccion.

Dialogo ta sigui pa eventual aumento di salario minimo 

Eman a enfatisa cu e aumento di e reparatietoeslag no ta remplasa e dialogo social cu Gobierno kier habri tocante eventual aumento di salario minimo rumbo na un “bestaansminimum”, pero cu Gobierno no kier y tampoco por laga e grupo aki sin apoyo mientras cu e dialogonan social lo ta desaroyando. “Mientras nos ta preparando pa e dialogo social cu e dunadonan di trabou y e sindicatonan, nos a sinti cu Gobierno tin un responsabilidad pa yuda reforsa e poder di compra p’e grupo aki,” Eman a declara.

Segun e Prome Minister, e ahuste ta forma parti di un strategia mas amplio pa proteha e bienestar di pueblo Arubiano, incluyendo tambe aumento den sosten pa esun cu handicap-uitkering y absorba parcialemente e aumento di prijs di combustibel.

“Gobierno ta serio den percura cu nos comunidad por haya e sosten cu nan merece. Prosperidad comparti mester traduci den mas siguridad y mas poder di compra pa nos pueblo,” Eman a conclui.