Señora Meverly Romano di DIMP:
* Deadline di pago pa di dos mita ta 30 di juni
ORANJESTAD (AAN): Departamento di Impuesto (DIMP) ta satisfecho cu e cumplimento di pago di number di auto pa aña 2026, asina señora Meverly Romano di DIMP a duna di conoce den un entrevista cu DIARIO.
Di e 100.196 cu tin registra, 86.068 number cu a wordo paga pa ful e aña. Esaki ta representa 86%. 84 number a ser paga pa e prome mita di aña y ainda e fecha no a vence y por paga e di dos mita ainda prome cu e fecha deadline cu ta 30 di juni. E grupo cu no a paga nada ainda ta 13.909 number. E cantidad di esaki a baha di 15% pa 14%.
E dos categorianan mas grandi di number di vehiculonan di motor ta categoria A, cu tin un total registra di 85.146 y MFA, cu un total di 3.672. E di tres categoria mas grandi ta e numbernan di V-car cu un total di 6.788.
Señora Romano a enfatisa cu e grupo cu no a paga e prome mita na fin di januari 2026, despues di e deadline di 30 di juni lo haya nan ta paga e prome mita pa nan por paga e di dos mita. Riba esaki, ya nan a haya un boet administrivo pa e prome mita cu nan no ta cumpli cu e pago. E boet aki ta 50% di e suma di impuesto di number di auto. Y si nan bolbe keda sin paga e segundo mita, nan lo bolbe haya e 50% di boet.
“Esaki ta un gasto cu ta bin acerca cu mester tene cuenta cu ne. Esaki ta segun tur ley di impuesto, ora tin incumplimento, semper tin un sancion. E sancion pa loke ta trata vehiculo di motor pa pagonan no haci na tempo, ta 50% di e suma di impuesto cu mester a paga. Riba esaki, si polis para un vehiculo cu no tin su impuesto paga, e ciudadano lo haya boet tambe y e gasto ta keda subi. P’esey, no ta recomendabel pa keda pospone pago”, Romano a remarca.
