Bureau City Inspector ta hopi satisfecho
ORANJESTAD (AAN): Pa loke ta e prome lunanan di 2024, cu seguridad por bisa cu Bureau City Inspector (BCI) ta hopi contento cu e respaldo cu comunidad ta duna, di tipnan valioso di sushedad y demas problemanan, via di nan aplicacion di fixi.aw pa raporta.
Den un entrevista cu Robby Rosel, kende ta relacionista publico di Bureau City Inspector, el a subraya cu nan ta contento cu e reaccion. El a divulga cu ultimo lunanan, e plataforma di Fixi.aw a lanta cabez unda a bin ricibi entre 2.000 pa 3.000 visitors, y cu e resultado cu autoridadnan ta hayando mas rapport.
“Fixi ta haciendo su trabao, y asina cu un ciudadano manda un reclamo cu potret y localidad, mesora e systema di Fixi ta re-transmiti e mensahe pa cada inspector di City Inspector, y nan ta delibera e ora cual ta bay tira un bista pa check e problema, y mira si e ta un trabao cu ta cay bao di BCI tambe.”
City Inspector ta atende tur reclamo cu ta drenta via Fixi.aw di e.o. unda cierto caminda publico ta sushi, tambe reclamo via Fixi.aw caminda tin bentamento di desperdicio riba un tereno cu ta publico.
Via Fixi.aw ta drenta tambe reclamo di hendenan cu ta laga awa di pos bay riba caya. Tambe tin ciudadano cu ta manda keho via Fixi.aw cu nan bakinan di sushi na cas no a wordo recogi. Esaki City Inspector na su turno ta re-transmiti pa Serlimar. Mesun cos ta pasa di reclamo di di matanan creciendo banda di caminda, City Inspector ta mande pa departamento concerni.
Rosel a splica cu nan ta keda cla cu haci areanan limpi via reclamo di Fixi.aw den promedio di 5 dia. Pero situacionnan cu no ta cay bao di City Inspector, ta wordo manda pa otro departamento y esaki kizas por tarda un poco pa e trabao keda cla.
Segun Rosel, e principal kehonan cu ta drenta via Fixi.aw te ainda ta e monton di lugarnan sushi den caminda publico, y tambe den mondi cu ta wordo descubri. City Inspector tin 6 ploeg cu ta yuda recoge sushi, y nan ta haci nan maximo esfuerso pa tuma tur e trabaonan aki pa purba keda cla cu nan den tempo cortico.
E cantidad di keho ta asina hopi, te cu Bureau City Inspector tin ploeg cu ta trahando riba Diasabra tambe caba. Y manera cu Ministro a divulga tambe recien, dentro di poco Bureau City Inspector lo bay cuminza traha cu warda tambe den oranan di anochi, pa Inspectornan por controla bentamento di sushi den mondi. Cualkier rapport via Fixi.aw cu drenta anochi, lo wordo controla mesora.
