Meverly Romano di DIMP:
- Cada ciudadano tin obligacion pa cumpli cu nan deber
ORANJESTAD (AAN): Durante un entrevista cu DIARIO, Meverly Romano di Departamento di Impuesto (DIMP) a aclaria e responsabilidad di e departamento, reaccionando riba comentarionan di ciudadanonan cu ta opina cu Gobierno mester drecha nos careteranan prome cu cobra impuesto.
Segun Romano, DIMP ta ricibi diferente comentario di personanan cu ta bisa cu DIMP ta haragan pa placa y ta expresa cu mester duna atencion prome na nos careteranan cu hopi biaha ciudadanonan ta keha cu nan ta den mal estado.
Sinembargo, Romano ta enfatisa cu mantenimento y reparacion di caretara no ta cay bou di responsabilidad di Departamento di Impuesto.
“Departamento di Impuesto su tarea ta cobra impuesto. Nos no tin truck di asfalt para pafo di nos edificio pa nos bisa cu awe nos ta bay drecha L.G. Smith Boulevard of cualkier otro caminda,” Romano a declara.
E ta sigui splica cu e placa cu DIMP ta cobra ta drenta den caha di Gobierno. Despues, Gobierno, hunto cu Departamento di Finansa, ta maneha e fondonan di acuerdo cu presupuesto di pais Aruba.
Romano ta reconoce cu cobransa di impuesto por wordo percibi como un tarea fastioso. No obstante, esaki ta un responsabilidad legal cu DIMP tin obligacion di ehecuta, pa percura cu e entradanan di impuesto drenta den caha di Gobierno.
“Laga mi ta bon cla: Departamento di Impuesto no ta drecha caminda. Esey ta cay bou di otro departamentonan. Nos trabao ta cobra belasting,” Romano a enfatisa.
Durante e entrevista, Romano a splica tambe cu tur ley fiscal tin sancionnan incorpora pa falta di pago of pago despues di e fecha final. Ley di impuesto di vehiculo di motor no ta un excepcion.
Si e fecha final pa paga impuesto di vehiculo di motor pasa y ainda tin un suma habri, e persona ta haya automaticamente un boet di 50% riba e suma pendiente.
DIMP ta recomenda tur contribuyente pa cumpli cu nan obligacion dentro di e periodo stipula, pa evita gasto adicional y e sancionnan estableci den ley.
