Robby Rosel, Vocero BCI:
ORANJESTAD (AAN) – E Relacionista Publico di Bureau City Inspector, señor Robby Rosel, a duna di conoce den entrevista cu DIARIO, cu e accion di pikimento di auto bieu ta tumando lugar, aunke e ta bay un tiki slow.
“Pero nos por bisa cu tur cos tabata canando slow pero aworaki nos a cuminza sali nos mes por mira unda tin y kico por haci pasobra mi ta mira cu hopi, hopi hende, tin manera un panico pa tuma contacto cu nos. Pero actualmente nos ta bezig ta bishitando diferente lugar unda cu di 1 di Juli te aworaki, nos a yega na un total di 40 auto mas of menos, cu ya caba a wordo kita for di caminda, cu nos ta bisa cu ta coi un average di 20 auto pa luna”, Robby Rosel a indica.
Rosel ta haya cu e ta hopi poco auto, mirando cu BCI ta mira hopi auto bieu. Aworaki BCI ta bezig ta wak con ta yega na un areglo pa autonan bieu cu ta wordo busca of cumpra for di otro hendenan, y cu tin companianan cu ta cumpra nan y ta deposita nan sea den nan cas, of den un cunuco, of ta haci uso di nan pa bende pieza, y tur esaki ta keda tira rond.
