ORANJESTAD (AAN): Na aña 2017 tabata ultimo biaha cu tabata tin Weganan Interinsular, e aña aki a tuma lugar Weganan Interinsular caminda cu prome weganan deportivo
a tuma luga den luna di maart na Bonaire unda cu den categoria di dammen y schaken, despues weganan a tuma luga na Curaçao unda a competi den trefball y atletismo y aki Aruba un biaha mas a haci un bon papel caminda den trefball Aruba a titula campeon IBiSA.
Dia 21 y 22 di april 2023 Aruba lo ta cede di Weganan Interinsular caminda cu lo competi den futbol y volleyball.
Apertura ta tuma luga dia 21 di april for di 5:00- 8:00 pm na Parke Curason Jaburibari (Cruyff Court).
Diferente pregunta a keda haci y un di nan ta pakico a stop 7 aña pasa cu Weganan Interinsular, un di e motibo nan grandi tabata tempo ey tabata tin problema cu aerolinea cu no a logra haya vuelo ultimo ora, e tempo ey scolnan cu a clasifica pa bay Weganan Interinsular no por a biaha.
Na e momentonan aki teamnan di futbol y volleyball ta den pleno preparacion, por a mira durante vakantie di semana santa, asina mes scolnan a presenta na training pa asina prepara nan mes pa Weganan Interinsular.
Aruba ta wordo representa cu 2 team di volleyball mucha homber cu ta scol Colegio Sagrado Curason como campeon y Maria School como sub campeon.
Pa cu e Weganan Interinsular na Aruba lo participa cu total di 80 mucha na ambos ramo di deporte.
Den futbol esaki lo ta den categoria mucha muhe scolnan avansa caminda campeon ta Colegio Arubano y sub campeon ta Colegio Nigel Matthew.
Entrada pa e weganan aki ta completamente gratis, weganan di futbol ta tuma luga na Parke Curason Jaburibari na Cruyff Court y weganan di volleyball ta tuma luga na Compleho Deportivo Frans Figaroa na Shaba.
Invitacion ta bay pa comunidad henter di Aruba pa bin apoya scolnan participante na Weganan Interinsular 2023 tanto den volleyball mucha homber y futbol mucha muher.
Weganan di volleyball ta inicia dia 21 di april pa 2:30 pm entre Colegio Sagrado Curason y Bonaire, futbol ta inicia pa 3:00 pm entre Colegio Arubano y Bonaire.
