Volunteer Motor Unit Aruba su prome edicion di Walk & Run 6Km tabata un exito

ORANJESTAD (AAN): Despues di 10 aña yudando voluntariamente tur careda y caminata na Aruba pa cu e seguridad di e participante nan riba ruta, Volunteer Motor Unit Aruba a lanta nan Fundacion oficialmente.

VMU tin como 20 miembro cu tin como hobby core nan Harley Davidson y pasa bon cu otro ora tempo ta permiti.

   Pero practicamente tur diadomingo mainta tempran na unda cu tin un careda of caminata na Aruba bo ta topa e VMU team.

   Diadomingo siman pasa, esta 18 di Februari a toca e biaha aki supervisa nan mesun Walk and Run na Paradera. A dedica e prome edicion di VMU Walk and Run na Jairon J-rod Dania kende ta 1 di fundadornan y a hasi aria ariba e mesun dia.

   E evento tabata "sold out" cu 600 participante den categoria di mucha, hoben, adulto y adulto mayor. Competencia tabata fuerte y e ruta cu su reto di subida y biento. Pero cu pasion pa e deporte e participantenan a gosa.

   E evento a inicia na momento cu a start e careda exactamente 6:00 am cu e zonido di Harley. Pa 7am a start cu e caredanan pa mucha den diferente categoria di edad cuminsando for di 4 aña.

   Na final tur participante a haya fruta, Gatorade y awa pa refresca, socialisa y saca potret den espera di e premiacion nan den diferente categoria di edad. Prome cu e premiacion a cuminsa a duna Jairon J-rod Dania un plaquette como reconocemento pa tur e trabou cu e la hasi for di comienso pa VMU. Tambe a duna un regalo na Madel Jacopucci cu a yuda VMU cu e mercadeo y asistencia den e organisacion.

   E ganadonan "overall" 6 KM masculino a resulta Jesus Galea y femenino Lana Gobert. Pa resultado por bay ariba www.vmurun.com 

   Volunteer Motor Unit ta gradici inmensamente tur persona, compania, organizacionnan y demas cu a contribui, yuda voluntario of a patrocina producto of servicio.  Cu boso ayudo y sosten, VMU a realisa e 1er Walk & Run. Tambe ta gradici tur miembro di Volunteer Motor Unit y tur otro voluntarionan cu a yuda.  E aporte valioso y tur e 600 participantenan a haci e evento aki exitoso den su prome salida.  Nan a splica cu edicion #2 lo bay ta Februari 2025.