Varios coach di islanan ABC ta na Aruba pa curso intensivo di US Soccer Education

ORANJESTAD (AAN): Riba Dialuna, diferente coache di e team di SV RCA di Aruba, di e team SV Flamingo di Bonaire,

y SV Victory Boys di Curaçao a cuminsa cu nan in-person courses pa nan D-License duna pa US Soccer Education aki na Aruba.

   Esaki ta prome bes cu US Soccer Education ta haci un curso manera esaki den Caribe. E curso aki lo bay ta 5 dia intensivo pa e coachnan.  Esnan cu ta duna e curso ta Kostas Hatzikoutelis, y Mario Garcia Carvajal.  Lo duna les di teoria, sigui pa les di practica riba veld.

   E curso aki ta e prome paso pa drenta den e ‘Professional Coaching Pathway” di US Soccer.

   Tur licencia di US Soccer ta reconoci pa Concacaf y FIFA, y ta marca un paso significante pa desaroyo di entrenadornan di futbol riba Islanan ABC.  E curso aki cu normalmente ta dura 6 luna, a ser adapta specialmente pa e islanan ABC, y asina duna e 26 coachnan cu a registra e chens pa completa esaki den un periodo mas cortico.

   Door di colaboracion cu US Soccer Education, e clubnan aliado tambe a logra obtene dos lugar pa islanan ABC den cada curso di C-License cu ta hopi keri na Merca.  E asina yama C-License tin solamente 100 lugar disponibel na Merca.  E oportunidad aki ta un paso importante pa esnan cu tin ambicion pa bira coach profesional y ta duna nan un caminda unda por sigui desaroya nan habilidadnan di entrenador.

   Tanto Dialuna y Diamars tabatin training, y tabata intensivo.  DIARIO ta desea nan tur clase di exito pa dianan venidero.