Un keeper di Britannia cu a causa furor durante try-out na Cali

Deymar Mercado ta fenomenal riba veld

ORANJESTAD (AAN): Di tempo cu el a cuminza hunga futbol caba, por a mira cu e ta un mucha cu yen talento.  El a afilia su mes y a bira keeper pa team di SV Britannia, y su habilidad a sigui crece dia pa dia.

   Ta trata aki di e hoben Deymar Mercado, kende ta un mucha naci na Aruba y ta hungando den e division di U11 actualmente.  Su deseo mes ta pa un dia e bira un hungador profesional di Futbol.

   Durante su temporada di ta hungando pa e division di U9 caba pa Britannia, el a duna indicacion claramente cu e ta un keeper fenomenal, y a demostra tambe hopi disciplina, concentracion, amor, y su compromiso pa cada wega.  E demas hungadornan di su team por depende di dje.

   Cu e chens di mira con oportunidadnan tey pa den futuro bira un gran futbolista, recientemente su mama cu ta procedente di Colombia, a viaha cune pa ciudad di Cali.

   Aki el a haya chens di haci un intercambio di e ‘Club Futbol Paz’, unda el a demostra tur loke e por para como keeper den goal.  E coach Kike Aponza a compañe tambe, y nan a produci resultado grandi durante e try-outs aki, y a mustra cu di berdad Deymar tin habilidadnan y haci su trabao di keeper hopi bon, y ta atento pa cada movimento di bala pa e actua mesora.

   Claro, el a mustra tur hende aya na Cali cu e ta procedente di Aruba!  Y sigur su progreso, su dedicacion, ta demostra cu deporte en general na Aruba por sigui bay dilanti cu e meta pa e hobennan aki bira personanan grandi na nivel mundial pa e deporte rey aki.

   DIARIO ta felicita Deymar y su famia y coach, cu e fenomenal try-out aki na Cali.