ORANJESTAD (AAN): Diahuebs atardi, DIARIO tabata presente ora cu a inaugura un torneo di billiard.
Esaki ta e di dos aña consecutivo cu gerencia di TT BILLIARDS ta organiza un torneo internacional y cu un dedicashon special. Na 2022 a reconoce e gran biljarista Orlando "Indio" Kelkboom. E aña aki ta toca turno na e maestro Richard "The Wolman".
Richard a cuminsa practica e deporte di billiard na un edad hopi jong, bou di e guia di q.e.p.d. Michel Victoria. Richard por ser yama e "campeon di tur tempo" paso for di decada 80 te cu awor, Richard ta keda titula campeon na varios ocasion. Como highlight internacional The Wolfman a titula Campeon Granprix na nivel Panamericano na 2004 y a gana multiple torneo den e region di ABC.
Tambe Richard ta e promer hungador pa representa Aruba na un Mundial y a haci esaki na varios ocasion. E weekend venidero hungadornan lo yega di Curaçao y Bonaire pa bataya den un torneo
fuerte y di bon nivel. Asina nan ta duna nan aporte na e ocashon aki special pa Richard Wolff.
Programa a start Diahuebs atardi caba. E lo continua awe Diabierna 6or y Diasabra lo start 1or di merdia. Si ta necesario lo tin weganan riba diadomingo.
Aruba completo ta invita pa yega TT BILLIARDS na Tanki Leendert y disfruta di bon bataya di billiard. E magno evento aki no lo ta posibel si no a haya coperashon di FEBIAR y sosten financiero di Pizza Hut Aruba, C.M.B. Cunucu Fresh, Oranjestad Garage, Aruba Green Riders, Get Rich Lottery, Eumar Lock, Auto Pro Body and Paint.
{gallery}Torneo internacional Dutch Caribbean 10-Ball Challenge 2023 dedica na Richard Wolff{/gallery}
