ORANJESTAD - Fundacion Movemento Ta Bida, en conexion cu su torneo Copa Jani Brokke 2022, ta presenta un tremendo torneo di biyar bola 8 pa tur esnan di 60 aña bay ariba.
Un invitacion ta bay pues pa tur e legendarionan di añanan 1940 bin ariba, cu ta sinta bou palo di kwihi conta “sterke verhalen” con nan tabata bari mesa tempo di nan tempo! Wel awo t’e momento pa “step up to the table” y demostra con antes ta rond un capoti!
Pa tur info tocante inscripcion (tin luga p’un maximo di 32 hungado), por contact sr. Moonchi Kelly na celular 699-1994. Inscripcion ta completamente gratis, y manera indica, tin lugar pa maximo 32 hungado, dus “First Come, First Served”! Yega cerca Moonchi, pasobra esnan tempran ta bebe awa limpi!
E torneo lo cuminsa diasabra awor 3 di september, lo sigui diasabra 10 di september, y lo termina diasabra 17 di september. Tur tres evento lo tuma lugar na Fermin’s Bar BQ na Bubali, net n’e rotonde di Bubali. Tur tres evento lo cuminsa 2’or di merdia, cu excepcion di diasabra awor 3 di september caminda lo cuminsa tira lot pa 1:30. Tur entrada pa tur tres etapa dje torneo ta completamente gratis y diasabra awor lo tin un banda live c’un ambiente mas cayente cu Dubai!
Ariba e prome etapa, 3 di september, niun participante lo keda elimina! Esnan cu perde dia 3, lo enfrenta otro den loser’s round ariba dia 10, y ey si lo ta un ambiente di corta rosea pasobra ta un pa tera un pa lama! Dia 17, tur esnan cu a sobrevivi lo enfrenta otro pa wak ken ta keda cu e Copa Jani Brokke 2022. For di info ricibi den “wandelgangen” ya caba tin nomber di basta hungado legendario cu a inscribi caba, e.o. e famoso “Shorry” Giel, “Lucky Luke” Lucas Tromp, e legendario Edwin Chirino, Carlo “Pythagoras” Croes, Maikel “Opname” Tromp, Omar “Kilowatt” Lampe, y varios otro mas! Shonnan, diasabra awor, lot lo wordo tira pa 1:30 na Fermin’s Bar BQ y e torneo dje legendarionan Copa Jani Brokke 60+ lo start pa 2:00 PM! Yega!
