Team U17 di Riverplate a haya un coach nobo

Reto nobo pa Ernst Mohammed

ORANJESTAD (AAN): Recientemente DIARIO Deportivo a tuma nota cu e team di SV Riverplate tin un coach nobo pa e division di U17 di e team.

   Ernst Mohammed a bira coach apunta di U17 di Riverplate.  Den un entrevista, Mohammed a bisa cu aña pasa el a mira e grupo di hoben aki cu ta hunga pa Riverplate y a nota cu nan ta hungando bon.  Ora cu a puntre pa bira coach di e division, mesora Mohammed a tuma esaki.

   “Mi a tume, pasobra mi sa cu e grupo di hoben aki por!  Nan por yega mas leu,” el a declara den un entrevista cu DIARIO.

   Su amor pa deporte ta pone cu e lo bay hinca tur su energia pa duna e hobennan aki un bon training!  Ademas, ainda Mohammed ta pidi hobennan cu kier hunga futbol y ainda nan no tin un team, nan por acudi cerca dje pa asina haya un chens di forma parti di e equipo dinamico aki.

   “Bo no mester ta un star... djis corda cu nos lo bay hacibo un star,” Mohammed a bisa.  El a enfatiza su cu tipo di training ta pa converti e hungadornan den un ‘team work’ bon, unda e no ta mira bo talento, pero ta mira con bo ta presta como team.

   Un team no ta djis 1 solo hungador, of 1 solo posicion.  E ta diesun hungador riba veld, y cada uno tin un tarea.  Ernst Mohammed ta spera cu cualkier hoben cu kier forma parti di e team U17 aki, pa yame.  Mohammed a bisa cu hobennan por yam’e na 594-1726 y bo tin chens di forma parti di e team.

   El a indica cu e team cu e tin aworaki ta consisti di hobennan serio, nan ta tumando e training full na cuenta, y nan ta moviendo den bon direccion.

   Ernst Mohammed ainda ta referee pa weganan di futbol.  Aunke e ta tratando di reduci esey un poco e asunto di referee, toch su deseo ta pa keda den mundo di futbol.  Y como coach esey lo bay ta un excelente oportunidad.  E veld di Riverplate ta ademas toch relativamente cerca di su cas, y loke a atrae ta e hecho cu e hobennan di U17 tin hopi interes, pero toch falta un hende pa duna nan e bon guia y disciplina, y tambe respet.  Loke nan ta siñando ta e respet pa otro, respet pa demas hende riba veld, y no ta haci chansa mas.

   Su prome tarea ta pa crea un nucleo di hungador pa por acudi na weganan den bon coordinacion, y segun Mohammed, e si lo bay duna tur hoben un chens pa hunga durante un wega, sea perde of gana.  E lo no laga ningun hende sinta riba banki.

    Di e forma ey, e ta mira cu den proximo añanan lo bay sigui crece cu e team, cu chens di bay Playoff y kizas hasta titula campeon.

   El a garantiza cu e tin hopi speranza cu e hobennan cu ya caba ta den e team, y cu den training ya caba a bin nota cu tin algun hoben cu habilidad fabuloso.  E tin par di defensa bon, algun mediocampista formidable, y djis falta par di hungador pa asina por competi como debe ser durante e aña di campeonato.

   E ta bisa di awor caba un bon bini na tur hoben cu kier bin afilia nan mes cu Riverplate, y tambe cuminza hunga weganan cu yen respet, bon comportacion y asina hunto por bay dilanti.  DIARIO ta desea Ernst Mohammed tur clase di exito cu su team.