Deporte di Domino
ORANJESTAD (AAN): Team Snor, e ekipo cu e uniform mas copioso den torneo bush league di domino, a cera aña 2024 cu nan tradicional torneo di fin di aña titula “NOS cu NOS” na e palacio di pega piedra, e mundialmente famoso Domino Square Garden.
E aña aki no solamente a celebra nan torneo di clausura, pero tambe a tene un “pakjesavond” estilo Sinterklaas y alavez tambe hacimento di aña di un hungado dje ekipo; cumpleaños di e capitan dje team tambe, y “last but not least” a celebra tambe e 40 aniversario di Nelson “Snor” Perez den sector hotelero. Un anochi “action packed” na moda di papia.
Den ronde di ganado, Siguert y Junior ta habri duro contra Joshua y Roy; Stanley cu Herman ta hala Wilson cu Lee “hala kita” un banda; Ronny cu Rafael ta weg cu Gregory cu Romana; Rigoberto y Gregorie ta “reset” Gilbert y Nicomeda; y Snor “himself” y chef Han ta cera Nigel y Dayenne nan buki. E bataya den rondo di ganado ta cuminsa bira mas turbulento y “luidruchtig” ora cu Junior cu Siguert schuif Stanley cu Herman pa rondo di perdedo y Rigoberto cu Gregorie ta mustra Ronny cu Raphael e porta di salida. Dje forma aki, Junior y Siguert ta sigura nan posicion den final.
E rondo di perdedo, necesario pa determina kendenan ta clasifica pa enfrenta Junior cu Siguert den final, ta resulta den berdadero “lucha a la muerte”, yen di emocion y gritamento, caminda facilmente un miembro di publico nobato por ser confundi si esaki ta un torneo di domino of un competencia ken ta dal e mesa mas duro cu piedra! Gregory cu Romana ta triunfa riba Nigel cu Dayenne; Wilson cu Lee ta manda Joshua cu Roy pa olvido; Gilbert cu Nicomeda ta manda Snor y chef Han “back to the future”. Snor cu Han tin nan prome wega perdi y ta continua contra Stanley cu Herman, kendenan ta convence Snor cu Han pa miho nan no kita di nan “day job” y sigui den sector di horeca! Ronny cu Raphael ta tumba Gilbert cu Nicomeda, y finalmente e duo aki ta dal Gregorie cu Rigoberto tambe un pusha p’e skina di olvido! Sinemargo, net ora ta wak e luz na final dje tunnel, Stanley cu Herman ta switch esaki “off” y ta clasifica p’e gran final.
E ultimo bataya ta entre Junior y Siguert versus Stanley y Herman, caminda den gran clase, Junior y Siguert ta logra corona nan mes na forma invicto como campeon Team Snor “NOS cu NOS” 2025! Otro anochi tremendo yen di ambiente riba e track record di e flamante “Snor” Perez! Di parti di Domino Square Garden y Team Snor ta bay un caluroso saludo p’e pueblo di Aruba p’e dianan di fiesta y nan miho deseo p’un 2026 yen di dicha y prosperidad! Ay nobe!
