Team di RCA  a bira campeon den Copa Aruba Bank Open class damas

 ORANJESTAD (AAN)- Diadomingo ultimo tabata tin final di e campeonato Copa Aruba Bank den deporte den open class femenino riba e mini veld di Britannia.

  E prome wega diadomingo atardi a bay entre Estrella y La Fama caminda e team di Estrella agana cu e score di 3 pa 2.

 Y e gran final di open class damas a bay entre Britannia y RCA caminda e team di RCA a bons bek duro den e di dos tempo pa kita e corona di campeon for di Britannia.

 E wega a ranca sali bon cu Tarianna Doornkamp anotando e prome gol di e partido y asina duna Britannia e ventaha di 1 – 0. Pero net prome cu halftime, Christy Ann Brete ta empata e wega 1 – 1. Den e di dos tempo, cosnan ta bolter por completo unda e ekipo di Solito, RCA a bin dicidi y ta tuma e ventaha di 2 – 1 pa medio di Izaline Angela. Despues tabata e pieza clave di RCA durante henter e Campeonato y playoff esta Lilianne Saladin cu ta anota dos gol tras di otro pa asina duna RCA e victoria di 4 – 1 riba Britannia. Remarcabel ta cu e victoria aki, RCA despues di basta aña a perde varios final contra di Britannia ta gana uno. Mas cu claro e celebra esaki engrande.

Na final presidente di AVB, Sr. Randolf Lacle den nomber di henter futbol femenino a hasi entrega di un bunita recuerdo na representante di Aruba Bank, Sra. Gina Habibe, esaki como muestra di aprecio pa e confiansa, apoyo y sosten na e futbol damas na Aruba.

Despues a bay over na e entrega di e premionan na e respectivo ekiponan di RCA y Britannia como tambe na esnan cu a sobresali individualmente. Minister di Deporte, Sr. Endy Croes como tambe representante di Aruba Bank, Sra. Gina Habibe den presencia di e directiva di AVB a hasi entrega di e copanan di campeon y di dos lugar na RCA y Britannia.