Team di ‘Hitters VT’ ta sigui crece den Campeonato Nacional

Competencia di Volleyball...

ORANJESTAD (AAN): Hitters VT a registra un victoria den U-13 y un victoria den U-15 durante e weganan reciente di Campeonato Nacional di Volleyball 2026–2027. E resultadonan ta refleha e intensidad di e competencia y e oportunidad cu cada wega ta brinda pa e jugadornan gana experiencia.

   Den U-13, Hitters a derota Fast Breakers cu 2–0. Den U-15, Hitters 1 a gana Chaos tambe cu 2–0. Hitters 3 a perde contra Fast Breakers 2 cu 0–2, mientras Hitters 2 a perde contra Synergy 1 cu 0–2. Den U-19, Hitters a perde contra Chaos cu 0–2.

   Pa Hitters VT, e resultado final ta solamente un parti di e jornada. Cada punto hunga ta un oportunidad pa siña, mehora y fortalece e confianza y cooperacion entre e jugadornan. E club ta felicita tur atleta pa nan esfuerso y ta anima nan pa sigui traha duro den e siguiente weganan.

   Programa pa e fin di siman: Diabierna, 13 di november na Pova, wega di U-19: Hitters VT contra Fast Breakers ta pa 7:15 pm pa 8:40 pm na Cancha 1.

   Diasabra, 14 di november na Compleho Deportivo Frans Figaroa, Noord, wega di U-13: All Set contra Hitters VT 1 ta pa 2:00 pm pa 3:15 pm na Cancha 1.

   Mesun merdia tin wega di U-15, Grupo A: Synergy 2 contra Hitters VT ta pa 4:30 pm te 5:45 pm na Cancha 2.

   Hitters VT ta invita famia, amistad y fanatico di volleyball pa bin apoya e damanan durante nan siguiente weganan. E presencia y animacion di e comunidad ta duna e atleta impulso pa sigui desaroya nan talento y disfruta di e deporte.