Team di Glovers ta bira campeon di Torneo Himno y Bandera Liga 60 na Aruba Juniors

Mario Wester ta picha tur wega

ORANJESTAD (AAN): E fin di siman cu a pasa a tuma luga, na compleho deportivo Aruba Juniors, e finalnan di Copa Himno y Bandera 2023 organiza pa SV Aruba Juniors. Den e finalnan a participa Bonaire Stars y Los Amigos di Curaçao.

   E dos teamnan no tabata competencia pa e teamnan di Aruba mirando cu nan a keda na ultimo luga di nan poole. Diasabra Glovers ta pasa pa final ganando Aruba Juniors y Bonaire Stars 4-1 y 6-2 respectivamente. Astros tambe a clasifica pa final ganando Surprise cu score di 8 pa 0 y despues ta gana Los Amigos di Curaçao den tie break 5-4.

   E final cu a tuma luga diadomingo tabata un revancha entre Astros y Glovers mirando cu aña pasa Astros a bay cu e titulo. Ya den di dos inning Glovers ta duna su pitcher estelar Mario Wester un ventaha di 2-0. Den cabes di 5 Astros ta crusa plato 4 pa tuma ventaha 4 pa 2.

   Un liña den center, di Rudi Carti, cu ta extende te na cura tabata bon pa un “in the park homerun” y corta e ventaha di dos careda y haci e wega 4-3. Den inning 6 Mario ta domina e bateadonan di Astros pa sali facil di e inning. Den bom di 6 inning Dennis Willeford ta dal hit pa manda Robert Haynes tercera base. Robert ta score riba hit di Sony Hurtado pa haci e wega 4-4. Riba un eror den tiro ta laga Dennis score e careda di bay ariba 5-4.

   Tin di comenta cu e final tabata un bon wega yena cu emocion. Cu e resultado aki Glovers ta bira campeon di e torneo y Astros ta keda como subcampeon. Den e wega pa di 3 luga Surprise ta gana Aruba Juniros 8 pa 4. Directiva di Aruba Juniors ta gradici tur team cu a participa na nan torneo y tur otro persona cu na un of otro manera a coopera pa e torneo tabata un exito.