ORANJESTAD (AAN): SV Unistars ta pa prome biaha den playoff pa promove bay division honor den futbol di Aruba
mirando cu nan a gana tur dos weganan contra FC San Nicolaas (2-1) y contra Sporting (4-2). E gran final lo mester wordo bataya entre SV Unistars y Atletico Santa Fe.
Ni Sv Unistars ni Atletico Santa Fe, no a yega di hunga futbol den Aruba su division maximo. Mirando cu awor ambos ekipo ta den e gran final unda cu e campeon lo promove directamente pa Division di Honor, esaki lo ta un presion enorme pa e ekiponan di barionan di Pos Chikito y Meiveld.
Ekipo di SV Unsitars di Pos Chikito ta existi desde anja 1988. Pues compara cu teamnan actual den division honor kizas un team relativamente hoben.
E actual miembronan di directiva y coachnan ta sinti cu Pos Chikito ta hopi den luz negativo pero ta spera cu e logro aki por trece cambio den esaki. Pos Chikito tin hendenan dedica cu ta hinka tempo y esfuerzo den cosnan positivo y pesey Unsitars ta batayando duru pa por logra yega division honor.
Directiva y coachnan ta spera di por conta cu sosten di bario di Pos Chikito henter pa cu e playoff aki y cu publico yega masal pa sostene SUBMARINO BLAUW UNISTARS UNICO! Alavez SV Unsitars kier a gradici su sponsornan, paso sin nan tur esaki lo no ta posibel.
E playoff ta wordo dedica na e fundador di SV Unsitars sr. Roy Croes d.f.m. y si en caso SV Unistars logra promove lo cumpli cu su gran soño di mira su ekipo di Pos Chikito hunga den hoofdklasse na Aruba.
Pues tin dos ekipo cu tin "History In The Making" akinan. No tin duda cu tur dos ekipo lo lucha den un bataya feroz pa asina mira ta cua di dos lo subi pa Division di Honor.
SV Unistars ta invita tur fanatico di futbol specialmente bario di Pos Chikito pa bin e gran final y asina apoya nos team! Fecha di e gran final lo ta dia 14 di mei den CD Frans Figaroa.
