SV La Fama a celebra na grandi e di dos lustro di titulo di campeon

ORANJESTAD (AAN):  Diasabra prome di Juli, tabata exactamente 10 aña cu e ekipo di division di Honor di La Fama,

a logra su prome titulo di campeon, superando e ekipo di Britannia cu anotacion di 2-0.

            Un momento historico pa e club cu riba mesun fecha ey, a cumpli 75 aña di existencia na 2013 y cu diasabra anochi a celebra su di 85 aña hunto cu fanaticada y miembronan, na e centro deportivo di La Fama na Savaneta.

            Un programa bon hinca den otro pa recorda e momento historico aki, caminda a purba di organisa un wega di revancha contra di mesun ekipo di Britannia cu tabata e rival di La Fama pa e titulo y cu a keda como sub campeon.

            Pa e ocasion aki a trata di reuni tur hungado cu a participa den e final historico aki,entre otro refuersonan di Bonaire, kende ta Rulove Andre Janga y Igmar Gijsbertha y tambe Pauleta Gijsbertha y tambe a bin specialmente pa e ocasion aki, e conocido Dje Dje Martha kende a anota e di dos gol den e final di 2013.

            For di oranan di merdia a inicia e celebracion cu participacion di mucha  y hobennan, hasta cu participacion di dos wega di veterano y cu a conta c’un atendencia hopi grandi cu a keda te den oranan laat pa rindi honor na e ekipo di La Fama cu a titula campeon na 2013.

            No ta tur hungado di e ekipo historico ey por a atende e celebracion ya cu algun ta den exterior  y no por a yega pero tin cu señala cu e medio campistr Gleison Barros a biaha for di Rio de Janeiro pa bin atende e celebracion di e di dos lustro di e titulo historico aki pa La Fama y e bario di Savaneta.

            Den un wega di fogeo entre La Fama Campeon 2013 y e ekipo di La Fama 2023, tabata e  campeonnan cu a bay cu e triunfo di 2-0 cu dos gol di Gijsberta den e prome tempo.

            Na final di e wega a reconoce algun fanatico y sostenedonan di e ekipo y tambe a presenta e ekipo historico na fanaticadanan cu a duna e ekipo otro reconocimento pa nan logra di 2013.