SV Dakota mester sosten di comunidad pa logra nan soño di instala turf riba veld

ORANJESTAD (AAN):  Sport Vereniging Dakota un biaha mas ta haci apelacion na ciudadanonan di e bario pero tambe di otro barionan pa saca un man y yuda nan realisa nan soño.

            SV Dakota ta den aña di celebracion grandi cu nan 75 aña di existencia, a logra conkista e maximo titulo di futbol ora cu nan a titula campeon Division Honor. Siguiendo cu e celebracion, nan a saca rifa di un auto cu e meta pa recauda suficiente fondo pa cumpli cu un parti di e plannan grandi nan tin pa atrae mas hoben  veld.

            E sorteo lo mester a tuma luga diabierna awo, sinembargo no a logra bende suficiente ticket cu lo por bisa e ta un aporte substancial pa e proyecto cu nan tin na caminda. Pa e motibo aki directiva a tuma e decision pa pospone e sorteo te cu 30 di september awor.

            Den cuadro di celebracion di 75 aña di existencia, a bini cu e idea pa rifa un auto pa recauda fondo. P’esey ta hopi agradecido na e comerciante- y ciudadanonan cu ya caba a duna un aporte sea cumprando ticket of buki for di e miembronan di SV Dakota.

            Despues di paga e auto, e ganashi cu saca mester sirbi pa pone e deposito pa instalacion di e turf na veld di Dakota. Manera ta conoci, turf ta costoso, pero e ta un atraccion, un gancho pa laga hobennan, tanto mucha homber como mucha muhe. P’esey loke cu haya for di e rifa ta apenas e prome paso, pasobra lo mester sigui haci mas evento pa financia e proyecto completo.

            Ta den un situacion dificil na e momentonan aki, sinembargo directiva kier haci un apelacion fuerte na henter Aruba pa duna un man pa realisa e proyecto, haci e soño aki bira realidad.

            Por tuma contacto cu cualkier miembro di directiva, hungadonan di SV Dakota y lo bay mira e grupo continuamente riba caya ofreciendo un ticket.