SV Britannia a titula Campeon di Futbol Division di Honor Oro

Decision a cay pa medio di penalty

ORANJESTAD (AAN): Pa dos biaha consecutivo, e potente team di Piedra Plat, esta SV Britannia a logra e titulo maximo di futbol na Aruba.  Esaki a socede despues cu e wega final di SV Britannia vs. SV Dakota a bay extra-tempo debi cu wega a keda 0-0, y na final via di Penalty, danki na fenomenal defensa di portero Josthan Maduro di Britannia, el a logra stop dos tiro di penalty.  Asina e futbolistanan di Piedra Plat a titula campeon.

   Wega a cuminza cu un ritmo neutral y ambos team tabata move na forma reserva riba veld.  Pero e momento mas hyper a cuminza ora cu Dakota a start cu atakenan riba porteria di Britannia.  Den e atakenan, Dakota tabata mas flexibel y tabata tuma riesgonan pa purba anota.

   Den di dos tempo, a nota cu e dos teamnan a cuminza move menos, comosifuera cu gasolin a caba.  Tur dos keeper casi no mester a actua mes.  Sinembargo na momento cu Dakota a haya un chens clave dilanti goal di Britannia, por a nota cu e team di ‘Dakota tur Dia’ a haya un empuhe di adrenalina y a cuminza pone presion enorme riba e team di Piedra Plat.

   Pero toch e wega a finaliza cu score di 0-0, y e ora a bay den tempo extra.  Ni maske kico nan a purba, no a logra anota goal.  Tur dos parti di 15 minuut a pasa, y na final keto bay score tabata 0-0.

   E ora a bay cu tiramento di penalty.  Stadion Guillermo Prospero Trinidad tabata completamente yen, y publico a cuminza grita di alegria ora cu keeper Joshtan Maduro a stop e prome bala, y despues tambe un otro bala.  Di e forma ey, Dakota a cay venci y mester a acepta cu nan a sali como Sub-Campeon.

   Ministro di Deporte, Gerlien Croes tabata presente pa entrega trofeo y felicita tanto SV Dakota cu nan titulo di Sub-Campeon, y tambe SV Britannia cu nan titulo di Campeon.  Ministro a indica: “Futbol a gana, deporte a gana, Aruba a gana! Pabien!”