SV Britannia a titula campeon den Division Dama

ORANJESTAD (AAN): Diasabra a tuma luga e wega final di futbol division dama. SV Britannia a enfrenta SV Racing Club Aruba (RCA).

E hungadonan Bindiya Wadhwani y Michaela Netto a anota e golnan ganado. E dos hungadonan aki a hunga un wega di play-off final den futbol U13 di mucha homber. Ambos a sobresali riba tereno demostrando un bon nivel di wega mescos cu cualkier mucha homber riba tereno. Y un biaha mas nan a demostra esey.

            E wega a bay bon pa Britannia, aunke tabata haci hopi calor, ya cu ta custumbra hunga anochi. Jorainne Wester-Maduro, capitan di Britannia, a expresa cu den e prome mita e calor a hunga un rol riba nan condicion y resistencia. Den e di dos tempo e hungadonan di Britannia a hunga nan wega. E torneo a bay bon y Britannia a purba yega tur wega. Lamentablemente algun ekipo no tabata por a cera un team completo pa hunga tur wega. En general e ta haya cu tur cos a bay bon.

            Pa loke ta e wega mes, tur cos a bay bon, segun coach di Britannia, Robert Geerman. E team ta haya mas mucha hoben y esey ta algo cu nan ta busca. E wega entre Britannia y RCA a bay un tiki mas facil pa nan compara cu esun anterior pasobra nan a gana RCA na 87 minuut. E biaha aki nan a bay mas miho. Geerman a expresa su deseo pa e presidente nobo di Arubaanse Voetbal Bond (AVB) dedica mas tempo na e damanan. E ta haya cu e damanan merece esey, pa sigui apoya nan y balora nan.

            Tin algun hungado a bay laga nan, otro ta forma nan famia, pero di otro banda nan a haya hungado hoben nobo, asina Wester-Maduro a expresa. Como cu nan a haya hungado hoben, esey kiermen awo nan tin di custumbra un tiki cu nan. E ta haya cu falta hopi hungado femenino y mester traha riba esey. E ta haya cu ora tende nomber Britannia y no kier hunga contra nan, djis p’e pensamento cu nan ta gana tur ora.

            Wester-Maduro a expresa, manera e ta apoya tur team, e kier pa nan keda pusha nan mes pasobra awo nan ta lanta. “Keda hunga, no ta importa si bo ta gana of perde. Un dia lo yega cu bo ta bay gana nos. Y e dia ey mi mes lo ta hopi contento, mi mes lo apoya nan”, el a expresa. Britannia ta gradici AVB y henter e team tras un torneo asina. Tambe na su team completo pa participa y traha te final. Tin di gradici e fanatico- y mayornan cu a laga nan yiu hunga cu Britannia, pero tambe pa engrandece futbol femenino.

            Milvienne Henriquez, coach di RCA, a expresa cu nan ta bezig ta busca hungado hoben. El a expresa cu nan a hala e hungadonan bieu un banda y purba di tene un team hoben. Bin cu hungado di edad mas hoben y pa hinca nan den e wega di diesun contra diesun. Esaki ta un experencia cu nan tin di pasa aden, pero awo ta bay prepara p’e campeonato normal mes di AVB. E campeonato aki a bin di biaha riba nan y ta gradici cu a bini cu ne. Nan a keda casi un aña sin hunga, nan tabata hunga ocho contra ocho, pero despues a bay diesun contra diesun. Nan ta gradici na AVB p’e oportunidad y awo ta bay prepara p’e campeonato grandi.