Speedworld cu boso amigo Hubert Tiel

*** Speedworld cu boso amigo Hubert"the Furai" Tiel, awe dedicando e pagina na Camacuri Harley Davidson Club,

cu no solamente ta conmemora su di 26 aniversario, pero tambe ta preparando un otro actividad grandi pa cu e celebracion di dia di nos Himno y Bandera proximo.

Durante di e press conference cu a tuma lugar den patio di Hooters, hopi splicacion a wordo duna, relaciona cu e proximo actividad, pero loke sigur a hala hopi atencion, tabata na momento cu señora Daphne Every a pidi President di CHDC den persona di  Buchi Croes, pa bin dilanti y modela pa esnan presente, pero prome cu esey a tuma lugar, a regala Buchi un Jacket completamente nobo, pa e por a modela cu style.

Na mes momento señor John Tromp a presenta un obra cu el a traha, special pa e momento special aki, cual sigur lo haya un bon lugar, algun dia cu e club keda cla.

Sigur un atardi hopi ameno, caminda te hasta un programa organiza pa D22 ariba Palo Marga a wordo treci dilanti y cu lo duna espacio pa nos amigonan di Curaçao, por bay y hasi nan kunsjes nan, sin cu mester bolbe tende, cu nan a hasi fastioso ariba cayanan di Aruba. Anyhow, SW ta desea CHDC tur clase di exito y por conta cu presencia di SW, cu porcierto a secuestra su mes, pero no a haya ningun voluntario ainda, pa paga e recompensa.

Jongen en meisjes, te cu e proximo oportunidad y corda semper, ariba caya ta pa core basila, nada di hasi drama. Laga coremento duro ariba caya pa Polis, Brandweer y Ambulance.