Sidney Ponson a firma letter of intent cu SV Bubali pa construi compleho unico di baseball

ORANJESTAD(AAN): Recientemente e ex pelotero di Major League Sidney Ponson a firma un ‘letter of intent’ cu SV Bubali via Sidney Ponson Charity Foundation, pa construccion di un parke di baseball.

Esaki lo ta riba e tereno di locual mester bira Compleho Deportivo di Bubali, unda S.V Bubali ta ubica, cu por cierto a cumpli 78 aña di existencia.

E intencion ta pa esaki bira un compleho deportivo special y unico cu lo stimula mas hoben ainda pa participa y sigui den deporte, specialmente baseball.

Ponson mes durante un conferencia di prensa a bisa cu e ta honra cu e hecho cu e intencion ta pa yama e compleho: Sidney Ponson Ballpark, pero e tin pensa di pidi permiso for di Major League pa yama e parke, Bubali MLB Sport Park.

“Mi nomber no ta importante, pero ami lo tey pa yuda e muchanan”, segun Ponson.

El a sigui bisa cu e tin diferente ex pelotero di Major League cla pa yude, manera Eugene Kingsale, Calvin Maduro y Melvin Mora, hunto tambe cu otro personanan cu amor pa baseball cu experticio y conocimento.