Shoco Legends ta cla pa nan di dos Bike Rally Scavenger Hunt

Diadomingo awor por inscribi pa esaki

ORANJESTAD (AAN): Den oranan di anochi durante un conferencia di prensa na Baru Lounge na Palm Beach, e organizacion di Shoco Legends Aruba B.C. a anuncia cu nan ta bay tene nan di 2ndo Bike Rally Scavenger Hunt.

   Comisario di e organizacion, Jairo Alvarez, a bisa cu despues di 3 aña nan ta organizando e evento aki atrobe.  Aki ta unda el a referi na e evento anterior, cu a genera asina bon comentario di e participantenan, y cu nan tur a pasa hopi dushi.

   E actividad lo ta riba Diasabra 30 di Juli 2022 y lo bay ta na Baru Lounge mes.  E lugar aki antes tabata conoci como Sand Bar Aruba.

   Nan 2nd Shoco Legends Bike Rally Scavenger Hunt 2022 lo bay conta cu varios post, y weganan divertido, y tur esaki por lo pronto ta secreto, te dia cu e evento tuma lugar y e ora lo haya e sorpresa.

   Alvarez a bisa cu e evento ta habri pa tur Bikers pa join e dia aki.

   E relacionista publico di Shoco Legends Aruba, esta Josy Koolman a indica cu nan lo organiza un anochi pa inscribi pa e evento.  Esaki lo ta na Baru Lounge mes, for di 7:00 pm te cu 10:00 pm.  Lo cobra un suma pa inscripcion pa cada persona, y pa esaki lo bo haya un Tas cu regalito, vouchers pa snackbox y refresco durante e rally, welcome-shot, y un toast.

   Cantidad pa cada grupo ta maximo 6 persona cu Bike, y aki bo por uza cualkier combinacion possible, pues 6 Bike cada un cu un persona, of 3 Bike cada un cu dos persona, of 4 Bike, 2 cu dos persona y 2 cu un persona, of cualkier otro combinacion, basta e ta 6 persona cu Bike.

   Tur grupo mester tin un nomber (pues aki tin di usa creatividad).  E grupo mester tin un leader (of yame capitan), mester duna un number di telefon cu por contact e dia ey.

   E evento ta 30 di Juli, y lo start y finaliza na Baru Lounge.  Grupo ta haya number y ora di sali, ora cu capitan meld cu full grupo tey. Reglanan di wega lo worde entrega den e tas dia di inscripcion, pa asina di adelanta tur hende lo ta na altura di esakinan.

   Nan a splica cu lo bay tin 6 post, di cual tur wega y opdracht ta worde haci door di un grupo priva di entretenimento, lo bay tin miembro di Shoco cu lo ta helper na e postnan.

   Diasabra e evento lo ta anochi. Durante e evento mes, e Biker friend Jeff Kock lo ta e discjockey animando e anochi aki. Lo bay tin premio pa e grupo di promer, Segundo y tercer lugar. Lo bay tin premionan sorpresa individual y pa grupo, y tambe doorprizes.  E Scavenger Hunto lo keda den area di Hotel y Noord.