‘Semper mi a soña di e momento aki’

Shawndrick Oduber a firma contrato cu Kansas City Royals:

ORANJESTAD(AAN): Recientemente e hoben hungador di baseball Shawndrick Oduber a firma un contrato cu e club di Major League Kansas City Royals y el a keda hopi contento.

“Mi ta hopi contento cu e oportunidad aki, pasobra hopi hende no ta haya e chens aki”.

Mi ta sintimi bendiciona y mi ta hopi agradecido na mi famia y tur esnan cu a yudami.

Aworaki e trabao ta bay cuminza, pasobra mi tin cu bay traha duro, segun Oduber, kende a indica cu semper el a soña di e momento aki.

E hoben pelotero a bisa cu tur hende por bira exitoso, si nan traha duro riba algo cu nan gusta hopi of algo cu semper nan a soña di dje.

Scout internacional pa Royals Edson Kelly tambe a hiba palabra y el a bisa cu ta un honor grandi di por ta sinta na mesa cu mayornan di Shawn, kende ta bay firma un contrato profesional pa forma parti di Kansas City Royals.

“Mi a cuminza sigui Shawn desde cu e tabata tin 14 aña y tabata para bati manera Giancarlo Stanton y ora cu mi a wak e picha mi a bisa su tata cu si e firma un contrato profesional, esaki ta bay ta como pitcher”, segun Kelly.

El a sigui bisa cu Shawn a tuma tur cos na serio y a sigui progresa.

Segun Kelly tabata tin varios otro equipo interesa den Shawn, pero e bon relacion cu e tin cu tata di e pelotero a yuda cu el a acepta e bon oferta di Kansas City.