Seleccion Nacional dunando bek a bishita Imeldahof y haci donacion di carchi pa wak e weganan

ORANJESTAD (AAN) – David Abdul, Coordinador di Seleccion Nacional di Futbol di Aruba, tabata den su di tres dia di “training camp”,

na Imeldahof, na unda e hungadornan a intercambia cu e muchanan y a haci nan un donacion di carchi, pa nan bay wak e seleccion hunga.

Abdul a bisa cu Diabierna di e siman aki tin un wega cu ta e evento principal, pero fuera di esey e kier pa e seleccion haci cosnan positivo pa comunidad (duna bek) den e aspecto social, etc., pa trece e seleccion mas cerca di comunidad y pa nan asumi responsabilidad como role model, pasobra na final di dia esey nan ta.

E seleccion a bay na diferente scol y Diaranzon a toca e turno na Imeldahof, na unda David tin bon contacto cu esnan cu ta dirigi e institucion y cu ta haci actividadnan pa e muchanan.

Nan a haci un donacion di carchi pa tur e muchanan di Imeldahof, pa nan haya e oportunidad di wak e Seleccion Nacional hunga, y tambe pa e muchanan hunga un rato cu e seleccion, pa ser conoci cu otro y tin un atardi ameno y e muchanan por intercambia cu e hungadornan.

Ademas di a haci donacion di carchi, lo wak e material si nan mester di bala y tur loke e seleccion por yuda cune, ta cosnan cu nan por haci di nan banda. Diahuebs nan lo ta na Instituto Coreccional KIA, na unda Abdul lo drenta cu e seleccion.

Nan a busca zapato di bala pa e detenidonan. “E seleccion kier duna bek na comunidad tambe, y pesey e proyectonan aki, pasobra futbol no ta solamente riba veld, pero e parti rond di dje tambe ta importante pa envolve comunidad den esaki, David Abdul a señala” e coordinador a conclui.