Seleccion di Aruba ta completamente cla pa wega di fogeo di awe Diasabra

Na Republica Dominicana

ORANJESTAD (AAN): Manera ta conoci, seleccion di team di Aruba ta na Republica Dominicana unda nan lo bay hunga un wega amistoso cu e seleccion Dominicano, awe Diasabra 23 di Maart 2024 na Stadion Cibao, cu ta keda na Santiago de los Caballeros.

   E wega lo bay ta 6:00 pm (ora di Aruba), y lo wordo transmiti via Telearuba.

   Riba e ranking di FIFA, aworaki Republica Dominicana ta na puesto #150.  Aruba mes ta na posicion #193.

   E wega di awe lo ta pa preparacion pa e CONCACAF Copa Mundial.  E Director Tecnico pa e seleccion di Aruba ta Marvic Bermudez, nacionalidad hulandes naci na Aruba.  E Director Tecnico pa Republica Dominicana ta Gabriel Marcelo, di nacionalidad Argentino.

   Pa e wega di awe, e hungadornan pa tin bista riba nan den e seleccion di Aruba lo ta Rovien Ostania, y di Republica Dominicana lo bay vigila Junior Firpo.

   Manera ta conoci, Aruba ta den Grupo C hunto cu Haiti, Curaçao, St. Lucia, y Barbados.

   Republica Dominicana mes ta den Grupo E hunto cu Jamaica, Guatemala, Dominica, y ta wardando pa mira ken ta sigui, pues si ta British Virgin Islands of US Virgin Islands.

   E seleccion di Aruba mes lo topa seleccion di Curaçao dia 8 di Juni venidero, y esaki ta pa clasificacion pa CONCACAF Copa Mundial.

   Posteriormente, Aruba lo enfrenta seleccion di St. Lucia dia 11 di Juni, y esey lo ta na isla di St. Lucia mes.